भद्रपुर, १२ असार । सधैं कापी किताब र कक्षाकोठाबीच सीमित भद्रपुरको एमरेल्ड एकेडेमीका विद्यार्थीहरू विहीवार केही फरक अनुभूति गरिरहेका थिए । स्कुलको चउरमा भेला भएका उनीहरुका साथमा न कापीकिताबको भारी थियो, न त नियमित अनुशासनका घण्टी सुनिएका थिए । त्यहाँ त एउटा पीडादायी यथार्थ मञ्चन भइरहेको थियो— ‘छोरा खोजौं’ भन्ने चेतनामूलक सडक नाटकमार्फत् ।
घाम तातिएको थियो, तर त्योभन्दा बढी तातिएको थियो दर्शकको मन । लागूऔषध दुर्व्यसनकाे कुहिरोमा हराइरहेका छोराको खोजीमा निस्किएका बाबुआमाको पीडा र समाजको लाचारी प्रस्तुत गर्ने यो नाटकले युवामाझ मात्र होइन, जनप्रतिनिधिदेखि शिक्षकसम्म सबैलाई चुप लाग्न बाध्य बनायो ।
सडक नाटक ‘छोरा खोजौं’ को कथा हाम्रो समाजकै एक सजीव चित्र हो । लागूऔषधको चक्करमा भासिएका युवाहरू कसरी आफन्त, अभिभावक, विद्यालय, र समुदायलाई बिथोल्छन् भन्ने कुरालाई गहिरो रूपमा छुन सफल छ यो सडक नाटक ।
स्थानीय युवा कलाकार कृष्ण अनमोलको लेखन तथा निर्देशनमा तयार गरिएको नाटकमा आरोग्य तिम्सिना एकजना पीडित बाबुको भूमिकामा छन्, जसले आफ्नो सन्तानलाई लागूपदार्थले बिगार्दा भोग्नुपरेको असहायताको भूमिका निभाउँछन् ।
प्रतीक लम्साल, नवीन तिम्सिना, जेनिशा पौडेल, रिदीप अधिकारी, सन्दर्भ तिम्सिना, श्रेया अधिकारी र आयुषा सिवा जस्ता उदीयमान कलाकारहरूले प्रस्तुत गरको यो नाटक अभिनयमात्र होइन, भावनाको पूर्ण विस्फोट थियो ।
भद्रपुर युवा परिषद्का संयोजक तथा नाटकका कलाकार आरोग्य तिम्सिना भन्नुहुन्छ ‘हामी नाटक खेल्न होइन, समाजलाई आँखा खोल्न आएको हौं । यो हाम्रो व्यक्तिगत जिम्मेवारी हो, किनकि लागूऔषधको पहिलो मार युवाले नै खेपिरहेका छन् ।’
छोरा खोजौं’ यसअघि नै चन्द्रगढी बजार र भद्रपुरका सार्वजनिक स्थानहरूमा प्रदर्शन भइसकेको छ । हरेक पटक नाटकको अन्त्यपछि दर्शक मौन हुन्छन् —तर त्यो मौनतासँगै चेतनाको बोध पनि हुने गर्छ ।
नगर प्रमुख गणेश पोखरेल भन्नुहुन्छ ‘ यस्तो सशक्त प्रस्तुति देख्दा लाग्छ, हाम्रो युवापुस्तामा चेतनाको ज्योति बल्न थालेको छ । यस्तो अभियानले स्कूले बालबालिकामा लागूपदार्थप्रतिको नकारात्मक धारणा बलियो बनाउँछ ।’
सडक नाटक केवल मनोरञ्जनको माध्यम होइन, सामाजिक परिवर्तनको सारथी हो भन्ने कुरा भद्रपुरका युवाले प्रमाणित गरेका छन् ।
‘छोरा खोजौं’ एउटा चेतनामूलक अभियान हो, जसले हामी सबैलाई लागूपदार्थ दुव्र्यसनजस्तो समाजको क्यान्सरसँग लड्ने हिम्मत दिन्छ ।
