दमक, ४ असोज / त्यो समयमा पुस्तक प्रकाशन गर्ने प्रकाशक पाउनु निकै ठूलो कुरा हुन्थ्यो । त्यस्तो परिस्थितिकाबीच झापा दमकका उपन्यासकार युवराज बरालको भनें प्रकाशकले नै मागेर भटाभट उपन्यास प्रकाशन गरिदियो । जसबाट उत्साहित बरालका एकैपटक चारवटा गरी जम्मा १५ वटा उपन्यास विद्या बुक्स विराटनगरले प्रकाशित गरिदियो ।
त्यो बेला उच्च शिक्षाको पढाई खर्च आफैंले जुटाएर पढ्ने स्वनिर्भरताको सोच अनुरुप ०५२ सालबाट लेख्न सुरु भएको उपन्यास लेखन कार्यले उहाँको पढाई खर्च गजबले जुट्यो र उहाँको नाम पनि परिचित बनायो । त्यो समयमा उहाँले अरुका लागि समेत दर्जनौं उपन्यास लेखिदिनु भयो । पूर्वमा त्यो बेला उहाँको उपन्यास धेरैले पढे र उहाँको नाम धेरैले प्रशंसाका पात्रका रुपमा दर्ज गरे । प्रतिक्रियाका चिठ्ठीपत्र हुलाकबाट दैनिक रुपमा हजारौं आए । ‘तर यो बेला न उहाँका कुनै उपन्यास नै उहाँसंग छन् न त ती १० औं हजार चिठ्ठीपत्र नै । मसँग भएको उपन्यासका प्रति पनि अरुले माग्दै लगे, अहिले सम्झिँदा आफूसँग एउटै पनि नहुँदा पछुतो लागिरहेको छ ।’–उहाँ स्मरण गर्नुहुन्छ । उहाँको उपन्यास ‘हिन्दु नारी’ र ‘लजालु आँखा’ पनि शुभचिन्तकले युट्युवमा हालिदिएकाले उपन्यासका नाममा त्यत्ति चिनो छ उहाँसँग ।
केन्द्रप्रसाद बराल र जानुका बरालका सन्तानका रुपमा वि.सं. २०२८ साल बैशाख २९ मा जन्मिनु भएका उहाँ हाल दमक ५ मा बसोबास गर्दै दमक मोडल क्याम्पसको सहायक प्रमुखका रुपमा अध्यापन पेसामा आवद्ध रहँदै आउनु भएको छ । तीनवटा विषयमा स्तातकोत्तर गर्नुभएका अन्तरमुखी स्वभावका मृदुभाषी बराल उपन्यासमा ऐतिहासिक नाम बनेर प्रेरणाको स्रोत हुनु भएको छ । उहाँसँग उज्यालो खबरको ‘अनुशीलन’ कार्यक्रमको ४४ औं श्रृंखलामा गरिएको कुराकानीको भिडिओ लिंक हेर्नुहोला ।
