भद्रपुर, १९ पुष । झापाको भद्रपुरमा भएको घटनामा यात्रु र चालक दलका सदस्यसहित ७ जना घाइते भएका मध्ये ६ जना उपचारपछि डिस्चार्ज भएका छन ।
घाइते सबैको अवस्था सामान्य रहेको प्रहरीले जनाएको छ। घाइतेमध्ये भद्रपुर नगरपालिका–१० बस्ने ४० वर्षीय सबिन जोगीको छाती, कम्मर र ढाड दुखिरहेको भए पनि बाहिरी चोट देखिएको छैन। बिर्तामोड नगरपालिका–७ की २० वर्षीया प्रेसिषा अधिकारीको बायाँ खुट्टा सुन्निएको छ भने बाहिरी चोट देखिएको छैन।
यस्तै, बिर्तामोड नगरपालिका–१ की ४२ वर्षीया सुमित्रा जोगीको बायाँ खुट्टा दुखिरहेको छ। दमक नगरपालिका–१ का २८ वर्षीय कमलप्रसाद कटुवालको दाहिने खुट्टामा सामान्य चोट लागेको थियो, उहाँ उपचारपछि डिस्चार्ज भइसक्नुभएको छ।
काठमाडौँ महानगरपालिका–१६ की ४० वर्षीया मुना घतानीलाई टाउको दुख्ने र चक्कर लाग्ने समस्या देखिएको छ भने उहाँकी १६ वर्षीया छोरी प्रिया घतानीको दाहिने घुँडामा चोट लागेको छ। दुवैको अवस्था सामान्य रहेको जनाइएको छ। उहाँहरु सबैजनाको उपचार पछि डिस्चार्ज भइसकेको झापा प्रहरीले जनाएको छ ।
यसैगरी, सह–पाइलट ललितपुर महानगरपालिका–४ का २४ वर्षीय सुशान्त श्रेष्ठको अनुहार र टाउकोमा चोट लागेको छ । उहाँको भने निरन्तर उपचार भइरहेको अस्पताल श्रोतले उल्लेख गरेको छ ।
घाइतेहरुको भद्रपुरस्थित ओमसाई पाथिभरा अस्पतालमा उपचार भएको थियो । राति करिब ९ बजेर १० मिनेटको समयमा काठमाडौँबाट भद्रपुर चन्द्रगढीका लागि उडेको बुद्ध एयरको एटिआर–७२ जहाज अवतरणका क्रममा रन–वे पार गर्दै पूर्वतर्फ करिब ३०० मिटर अगाडि भासिएर क्षतिग्रस्त भएको थियो ।
