सोलुखुम्बु — हिमाली जिल्ला सोलुखुम्बुको पर्यटकीय क्षेत्र लुक्लामा एक सातादेखि विद्युत् आपूर्ति बन्द भएको छ । लुक्ला बजारमा विद्युत् आपूर्ति बन्द हुँदा होटल व्यवसायी तथा पर्यटकको दैनिकी कष्टकर बनेको छ ।
लुक्लामा भर्खरै निर्माण सम्पन्न बोमखोला मिनी हाईड्रोपावर लिमिटेडको पावर हाउसमा एक साता अगाडि चट्याङले क्षति पुर्याउँदा लुक्ला बजारमा विद्युत् आपूर्ति बन्द भएको हो ।
विद्युत् नहुँदा पर्यटकको बसाई, मोबाइल फोन चार्जजस्ता कुराहरुमा समस्या भएको स्थानीय होटल संचालक विक्रम तामाङले बताए । ‘बिजुली नहुँदा लुक्ला क्षेत्रमा नियमितरुपमा फोन, मोबाईल र ईन्टरनेट सेवा ठप्प भएको छ भने राति मैनबत्ती बालेर पर्यटकलाई राखिरहेका छौं,’ उनले भने । बिग्रिएको लामो समय हुँदासमेत विद्युत् सञ्चालन गर्ने पहल नभएको गुनासो होटल व्यवसायीहरुको छ ।
१४ करोड १० लाख रुपैयाँको लागतमा बनेको २ सय किलोवाट क्षमताको उक्त जलविद्युत् आयोजनाको पावर हाउसमा रहेको कन्ट्रोल सिस्टममा नै चट्याङले क्षति पुर्याएको आयोजनाका अध्यक्ष एवं खुम्बु पासाङ ल्हामु गाउँपालिका २ का वडाध्यक्ष आङफुर्वा शेर्पाले बताए । विद्युत् बन्द हुँदा नम्बर २ का ४ सय ५० घरधुरी उज्यालोबाट बन्चित भएका छन् । दैनिक २ सय को हाराहारीमा लुक्ला भित्रिने विदेशी पर्यटक यसको प्रत्यक्ष मारमा परेका छन् । ‘विद्युत् सञ्चालनका लागि विदेशबाट सामान झिकाउने काम भइरहेको छ, अबको ४ दिनभित्र बिजुली बल्छ,’ अध्यक्ष शेर्पाले भने ।
