बिराटनगर/ ब्याजदर घटाउन माग गर्दै ज्ञापनपत्र बोकेर गएको व्यापारीको टोलीलाई सुरक्षागार्डले रोकेपछि विराटनगरका व्यापारी नेपाल राष्ट्र बैंक अगाडि धर्नामा बसेका छन् । कर्जाको ब्याजदर १० प्रतिशत कायम गर्नुपर्ने मागसहित आज मोरङ व्यापार संघको टोली राष्ट्र बैंकको प्रदेश नम्बर–१ को प्रादेशिक कार्यालय विराटनगर अगाडि धर्नामा बसेको हो ।
ज्ञापनपत्र बुझाउन जाँदा सुरक्षाकर्मीले रोकेपछि उनीहरू धर्नामा बसेका हुन् । निक्षेप ब्याजदर ६ प्रतिशत र कर्जाको ब्याजदर १० प्रतिशत कायम गर्नुपर्ने माग गर्दै मोरङ व्यापार संघका अध्यक्ष नवीन रिजाल नेतृत्वको पदाधिकारी टोली राष्ट्र बैंकको कार्यालय पुगेको हो । ज्ञानपपत्र बुझाउन गएको टोली धर्नामा बसेपछि राष्ट्र बैंक विराटनगर कार्यलयका प्रमुख समेत रहनुभएकी निर्देशक मीना पाण्डेले ज्ञापनपत्र बुझनु भएको छ ।
उद्योगीलाई कर्जाको ब्याजदर ‘सिंगल डिजिट’ कायम गर्नुपर्ने प्लेकार्ड प्रदर्शन गर्दै व्यापार संघको टोली राष्ट्र बैंकमा पुगेको हो । प्लेकार्डसहित व्यापार संघको टोली राष्ट्र बैंकमा जाँदा राष्ट्र बैंकले ज्ञापनपत्र बुझ्न अस्वीकार गरे पनि पछि राष्ट्र बैंकका निर्देशक पाण्डेले गेटमा आएर ज्ञापनपत्र बुझनु भएको हो ।
व्यापार संघको टोलीले गभर्नरविरुद्ध नाराबाजी गर्दै गएकोले संवेदनशील क्षेत्रमा प्रदर्शन गर्न नहुने भन्दै ज्ञापनपत्र बुझन् अस्वीकार गर्नुभएको थियो । व्यापारीले धर्नामा बसेर नाराबाजी गरेपछि निर्देशक पाण्डेले गेटमै आएर ज्ञापनपत्र बुझ्नु भएको हो ।
