काठमाडौं,४ असार । पोर्चुगलका कप्तान क्रिस्टियानो रोनाल्डोले फिफा विश्वकप २०२६ को पहिलो खेलमा अपेक्षाअनुसार प्रदर्शन गर्न सकनु भएन । डिआर कंगोसँग १–१ गोलको बराबरीमा टुंगिएको खेलमा उहाँले जम्मा २५ पटक मात्र बल छुनु भएको थियो। यो उहाँको विश्वकप करिअरकै सबैभन्दा कम सक्रिय प्रदर्शनमध्ये एक मानिएको छ ।
ईएसपीएन एफसीका अनुसार खेलभर रोनाल्डोले तीन पटक गोलपोष्टमा प्रहार गरे पनि कुनै पनि प्रहार लक्ष्यमा पुग्न सकेन । अधिकांश समय डिआर कंगोको रक्षापंक्तिले उहाँलाई प्रभावहीन बनाइरह्यो । रोनाल्डोको सीमित सहभागिताले पोर्चुगलको आक्रमणमा समेत असर परेको देखियो । विश्व फुटबलका चर्चित फरवार्डका रूपमा चिनिने उहाँ यस खेलमा विपक्षी रक्षकहरूको कडा निगरानीमा परेपछि प्रभाव जमाउन असफल हुनु भएको हो।
खेलको छैटौं मिनेटमा जोआओ नेभेसले गोल गर्दै पोर्चुगललाई अग्रता दिलाउनु भएको थियो । तर पहिलो हाफको इन्जुरी समयमा डिआर कंगोका योआन विस्साले बराबरी गोल फर्काएपछि खेल १–१ को अवस्थामा पुग्यो । दोस्रो हाफमा पोर्चुगलले केही अवसर सिर्जना गरे पनि त्यसलाई गोलमा परिणत गर्न सकेन ।
अन्ततः दुवै टोलीले एक–एक अंक बाँड्दै प्रतियोगिताको सुरुआत गरेका छन् । यस खेलसँगै रोनाल्डो प्रमुख अन्तर्राष्ट्रिय प्रतियोगितामा लगातार १० खेलसम्म गोल गर्न नसक्ने अवस्थामा पुग्नु भएको छ। यता सन् १९७४ पछि पहिलो पटक विश्वकप खेलिरहेको डिआर कंगोले बलियो प्रतिद्वन्दी पोर्चुगलसँग बराबरी खेल्दै ऐतिहासिक जित हात पारेको छ । एएनआई
