मोरङ — भाषाशास्त्री बालकृष्ण पोखरेलको स्मृतिग्रन्थ प्रकाशित भएको छ । विराटनगर महानगरपालिका कार्यालयले स्मृतिग्रन्थसँगै ‘ऐतिहासिक विराटनगर’ पुस्तक प्रकाशित गरेको हो । विराटनगरमा सोमबार आयोजित कार्यक्रममा प्राध्यापक गोपाल भण्डारीलगायतले दुवै पुस्तक विमोचन गरे । स्मृतिग्रन्थ विवश पोखरेलले सम्पादन गरेका हुन् ।
२०२१ सालमा पोखरेलले मदन पुरस्कार प्राप्त गरेका थिए । प्रज्ञा प्रतिष्ठानको नेपाली बृहत् शब्दकोश तयार पार्न उनले २०३६ देखि ५ वर्षसम्म योगदान गरेका थिए । त्यस्तै, ५२ वर्षको खोजपछि उनले ७५ हजार शब्दको बृहत् नेपाली–अंग्रेजी नेपाली कोश प्रकाशित गरेका थिए । लामो समय विराटनगरमा बिताएका उनको ८६ वर्षको उमेरमा २०७५ फागुनमा निधन भएको थियो । ८ सय १२ पृष्ठको स्मृतिग्रन्थमा विभिन्न व्यक्तिले पोखरेलका विषयमा लेखेका रचना संगृहीत छ ।
महानगरको इतिहास समेटिएको कृति ‘ऐतिहासिक विराटनगर’ समालोचक दधिराज सुवेदीले तयार पारेका हुन् । महानगरले दुवै पुस्तक प्रकाशित गरेर विराटनगरको इतिहासको संरक्षण गर्ने काम गरेको प्राध्यापक भण्डारीले बताए ।
४ सय ९ पृष्ठको पुस्तकमा विराटनगरको परिचय, सेनवंशी शासन, भेडियारी र विराटराजाको दरबार, विराटनगरको नामकरण र ऐतिहासिकताका बारेमा उल्लेख छ । पुस्तकमा महानगरमा भाषा–साहित्य, ऐतिहासिक विद्यालय, राजनीति, धर्म, संस्कृति, उद्योग, कला, खेलकुदलगायत क्षेत्रमा भए/गरेको विकास र इतिहासबारे उल्लेख छ ।
