काठमान्डौं, ४ साउन । यातायात व्यवस्था विभागले सेवाग्राहीलाई एक हप्तासम्म अत्यावश्यक कामबाहेक कार्यालय नआउन आग्रह गरेको छ।
पूर्वाधार विकास मन्त्रालयअन्तर्गत रहेको विभागले आज सूचना जारी गर्दै यातायात क्षेत्रसँग सम्बन्धित प्रणाली सुधार, डाटा स्थानान्तरण तथा नयाँ करका दरहरू प्रविष्टि र मिलानको काम भइरहेको जनाएको हो।
विभागका अनुसार यातायातसम्बन्धी विभिन्न प्रणालीलाई थप सेवाग्राहीमैत्री र व्यवस्थित बनाउन प्राविधिक सुधारको काम भइरहेको छ। प्रदेश सरकारबाट निर्धारण गरिएका नयाँ करका दररेट प्रणालीमा अद्यावधिक गर्नुपर्ने भएकाले केही समय लाग्ने बताइएको छ।
विभागले जारी गरेको सूचनामा उक्त काम पूर्ण रूपमा कार्यान्वयन हुन करिब एक हप्ता समय लाग्ने उल्लेख गर्दै अत्यावश्यक कामबाहेक यातायातसम्बन्धी सेवा लिन कार्यालय नआउन अनुरोध गरिएको छ।
विभागले सेवाग्राहीलाई २०८३ साल साउन ८ गतेपछि मात्र सम्बन्धित कार्यालयमा सम्पर्क गर्न आग्रह गरेको छ।
प्रणाली सुधारका कारण केही समय सेवा प्रभावित भए पनि दीर्घकालीन रूपमा यातायात सेवा सहज, छिटो र व्यवस्थित बनाउने उद्देश्य रहेको विभागले जनाएको छ।
