काठमान्डौं ,११ साउन ।दक्षिणपूर्वी एसियाका देशमा सञ्चालन भइरहेका अवैध अनलाइन ‘स्क्यामिङ’ सेन्टरमा नेपाली जाने क्रम नरोकिएपछि परराष्ट्र मन्त्रालयले गम्भीर चासो व्यक्त गरेको छ।
कम्बोडिया, म्यानमार, लाओस र थाइल्यान्डमा रहेका यस्ता अवैध केन्द्रबाट पछिल्लो समय ८६० जना नेपालीको उद्धार गरिएको परराष्ट्र मन्त्रालयले जनाएको छ। उद्धार गरिएकामध्ये ७३३ जना कम्बोडिया, ११३ जना म्यानमार, ८ जना लाओस र ६ जना थाइल्यान्डबाट ल्याइएको बताइएको छ।
तर उद्धार प्रक्रिया पूरा भएका केही नेपालीसमेत स्वदेश फर्किन अनिच्छुक देखिएपछि मन्त्रालयले परिवार र आफन्तलाई सक्रिय भूमिका खेल्न आग्रह गरेको छ।
परराष्ट्र मन्त्रालयले कम्बोडियालगायतका देशमा नेपाली पठाउने गैरकानुनी काममा संलग्न व्यक्ति वा गिरोहबारे वास्तविक विवरणसहित नेपाल प्रहरी तथा सम्बन्धित निकायमा उजुरी दिन आग्रह गरेको छ।
मन्त्रालयले जेलबाट छुटाइदिने, पैसा लिएर समस्या समाधान गरिदिने भन्दै ठगी गर्ने व्यक्तिबाट सावधान रहन पनि सचेत गराएको छ। यस्ता विषयमा आधिकारिक निकायबाट मात्र कानुनी सहायता र जानकारी लिन आग्रह गरिएको छ।
हाल कम्बोडियामा मात्रै ४९ जना नेपाली जेलमा रहेको र उनीहरूको कानुनी सहायता तथा उद्धारका लागि नेपाली दूतावासमार्फत समन्वय भइरहेको परराष्ट्र मन्त्रालयले जनाएको छ।
विदेशमा आकर्षक रोजगारीको प्रलोभन देखाएर फसाउने गिरोह सक्रिय रहेकाले विदेश जानुअघि रोजगारदाता, कामको प्रकृति र कानुनी प्रक्रियाबारे राम्रोसँग बुझ्न आवश्यक देखिएको छ।
