काठमाडौं, असोज १०।संयुक्त राष्ट्रसंघको ८१औँ महासभालाई सम्बोधन गर्न संयुक्त राज्य अमेरिकाको न्यूयोर्क पुग्नुभएका प्रधानमन्त्री बालेन्द्र शाह शनिबार अपराह्न स्वदेश फर्कनुभएको छ। त्रिभुवन अन्तर्राष्ट्रिय विमानस्थलमा प्रधानमन्त्रीको आगमनलगत्तै परराष्ट्र मन्त्रालयद्वारा आयोजित पत्रकार सम्मेलनमा भ्रमण तथा महासभा सहभागिताबारे विस्तृत जानकारी दिइएको छ।पत्रकार सम्मेलनमा परराष्ट्र मन्त्रालयका निमित्त सचिव गणेशप्रसाद ढकालले महासभामा नेपालले जलवायु न्याय, क्षेत्रीय समन्वय र पर्वतीय अर्थतन्त्रका विषयलाई सशक्त रूपमा उठाएको जानकारी दिनुभयो। “नेपालका लागि जलवायु परिवर्तन मानवीय संकट मात्र नभई समग्र विकासको गम्भीर चुनौती बनेको छ,” निमित्त सचिव ढकालले भन्नुभयो।नेपालको विश्वव्यापी हरितगृह ग्यास उत्सर्जनमा योगदान ०.१ प्रतिशतभन्दा पनि न्यून रहे तापनि नेपालले यसको चरम, असमान र गम्भीर असर खेपिरहनुपरेको यथार्थ राष्ट्रसंघीय मञ्चमा प्रस्तुत गरिएको उहाँले प्रस्ट्याउनुभयो।
विशेषगरी हिमाली पारिस्थितिकीय प्रणाली (इकोसिस्टम) मा परेको असरले हिमनदी तथा हिमतालहरू तीव्र रूपमा पग्लिँदै गएको, जसका कारण हिमपहिरो, बाढी तथा पहिरोजस्ता प्राकृतिक विपद्को जोखिम अस्वाभाविक रूपमा बढेको विषयलाई नेपालले अन्तर्राष्ट्रिय समुदायसामु ध्यानाकर्षण गराएको छ।जलवायुजन्य जोखिम न्यूनीकरण गर्न हिमतालहरूको निरन्तर निगरानी र पूर्वसूचना प्रणालीलाई थप सुदृढ बनाउनुपर्ने खाँचो औँल्याउँदै ढकालले हिमाली क्षेत्रको विपद् सीमापारसम्म फैलिने भएकाले प्रभावकारी अन्तर्राष्ट्रिय एवं क्षेत्रीय समन्वय अपरिहार्य रहेको उल्लेख गर्नुभयो।यसै सन्दर्भमा नेपालले ‘हिमालयन क्लाइमेट रेजिलियन्स मेकानिजम’ स्थापनाको औपचारिक प्रस्ताव अघि सारेको जानकारी दिइएको छ। उक्त संयन्त्रमार्फत हिमाली क्षेत्रमा जलवायु परिवर्तनका चुनौती सामना गर्न क्षेत्रीय सहकार्य, विपद्को पूर्वसूचना आदानप्रदान तथा राहत एवं उद्धार व्यवस्थापनमा प्रभावकारी साझेदारी निर्माण हुने अपेक्षा नेपालले लिएको छ।
