काठमाडौँ,१८ असोज । पश्चिम बंगालको डुवर्सस्थित बिरपाडा अस्पतालमा नेपाली भाषी गोर्खा समुदायकी एक युवती माथि दुर्व्यवहार भएको आरोपपछि विवाद चर्किएको छ। घटनाको विरोधमा अस्पताल परिसरमा भेला भएका गोर्खा समुदायका प्रतिनिधि समक्ष आरोपित डाक्टरले हात जोडेर माफी मागेको बताइएको छ।
घटनापछि आक्रोशित गोर्खा समुदायका मानिसहरू अस्पताल परिसरमा भेला भएर विरोध जनाएका थिए। उनीहरूले अस्पतालमा कार्यरत सम्बन्धित डाक्टरसँग घटनाबारे स्पष्टीकरण माग्दै भविष्यमा यस्तो व्यवहार नदोहोर्याउन चेतावनी दिएका थिए।विरोधका क्रममा डाक्टर मजुमदारले गोर्खा समुदायसमक्ष माफी माग्दै आगामी दिनमा यस्ता घटना दोहोरिन नदिने प्रतिबद्धता व्यक्त गरेको बताइएको छ।
घटनाप्रति असन्तुष्टि जनाउँदै गोर्खा समुदायका प्रतिनिधिहरूले अब समुदायमाथि फेरि यस्तो दुर्व्यवहार भए सहेर नबस्ने चेतावनी दिएका छन्। उनीहरूले बिरामी तथा सेवाग्राहीसँग सम्मानजनक व्यवहार गर्नुपर्नेमा जोड दिँदै भाषाका आधारमा कसैलाई पनि दुर्व्यवहार गर्न नहुने बताएका छन। बिरपाडा अस्पतालमा भएको यस घटनाले नेपाली भाषी गोर्खा समुदायको सम्मान र सेवाग्राहीप्रतिको व्यवहारको विषयलाई पुनः चर्चामा ल्याएको छ।
