दमक/
झापाको कनकाई-माई नदी किनारमा लागेको माई मेलामा भक्तजनहरूको घुइँचो लागेको छ । आज मकर अर्थात् माघे सङ्क्रान्ति हो । हरेक वर्ष आजको दिन स्वतःस्फूर्त रुपमा कनकाई-माई नदी किनारमा भव्य मेला लाग्दै आइरहेको छ ।
धार्मिक आस्था र विश्वास राख्ने भक्तजनहरूले मकर सङ्क्रान्तिका दिन सूर्य उत्तरायण भएका बेला गरिएको स्नान, दान, जप तप, तीर्थ, व्रतलाई उत्तम मानिन्छ । त्यसैले नदीमा नुहाएर पूजाआर्चना गरे आफूले चिताएका मनकामना पूरा हुने धार्मिक विश्वास रहेको भक्तजनहरू बताउँछन् । आइतबार बिहानैदेखि नदी किनारमा पूजापाठ गर्नेहरूको घुइँचो छ ।
विगतमा तीन दिन लाग्दै आएको मेला अहिले पाँच दिनसम्म लाग्ने गरेको छ । कनकाई नगरपालिका र शिवसताक्षी नगरपालिकाको संयुक्त आयोजनामा नदीको दुवै किनारमा मेला लगाइएको छ ।
कनकाई पुल पूर्वपट्टि कनकाई नगर प्रमुख राजेन्द्रकुमार पोखरेल र कनकाई पुल पश्चिमपट्टि शिवसताक्षी नगर प्रमुख मेघा हाङ थोप्राले मेलाको उद्घाटन गरेका थिए ।
मेलामा रोटेपिङ, विभिन्न खेल तमासा, ब्रेकडान्स, बटर फ्लाई, कोलम्बस, विभिन्न जातजातिका झाँकी, कला साहित्यका विविध कार्यक्रम आयोजना गरिएको छ । माई मेलामा यो वर्ष २ लाख तीर्थयात्री मकर स्नान गर्न आउन सक्ने अनुमान गरिएको आयोजकले जनाएको छ ।
मेलाका कारण पूर्व पश्चिम राजमार्ग अन्तरगतको कनकाई नदीको पुलमा भिडभाड नियन्त्रणका लागि नदीमै आयोजक समितिले काठको पुल निर्माण गरेको प्रहरी कार्यालय झापाका डीएसपी वसन्त पाठकले जानकारी दिनुभयो ।
मेलाको सुरक्षा व्यवस्था कडा बनाइएको बताउँदै डीएसपी पाठकले भने, ‘कनकाई पुल पारीवारि दुई डीएसपीको नेतृत्वमा तीन सय सुरक्षाकर्मी परिचालन गरिएको छ ।’ राजमार्गमा ट्राफिक व्यवस्थाका लागि ट्राफिक प्रहरी र मेला स्थलमा सादा पोसाकमा पनि प्रहरी खटाइएको उनले बताए । माई मेलामा झापा, मोरङ, सुनसरी, धनकुटा, इलाम, पाँचथर, ताप्लेजुङ लगायत भारतको सिलिगुडी, सिक्किम, दार्जिलिङ, असाम, मणिपुर लगायत भुटानबाट पनि भक्तजनहरू आउने गरेको छ ।
