दमक, ८ साउन ÷ दमकमा नेतृत्व, व्यक्तित्व विकास एवम् समाजसेवाको क्षेत्रमा सक्रिय लायन्य र लियो मातहतका सातवटा संस्थाले मंगलबार संयुक्त कार्यक्रम गरी इन्डक्सन र इन्स्टलेसन् कार्यक्रम सम्पन्न गरेका छन् ।
लायन्स क्लब अफ दमक स्वीट सिटी, लायन्स क्लब अफ सेन्ट्रल, लायन्स क्लब अफ हेल्पिङ हर्टस्, लायन्स क्लब अफ बिग बुद्ध, लायन्स क्लब अफ सर्भिङ हर्टस् तथा लियो क्लब अफ दमक स्वीट सिटी र लियो क्लब अफ दमक बिग बुद्धको प्रेरणा सहितको पदस्थापन कार्यक्रम सम्पन्न भएको हो । जहाँ वर्ष २०२४ र २०२५ का लागि नयाँ समिति चयन भइ पदस्थापन भएको छ ।
कार्यक्रममा लायन्स क्लब इन्टरनेशनल डिस्ट्रिक ३२५ सि का डिस्ट्रिक गभर्नर विकास अधिकारीले दमकमा लायन्य र लियोले प्रभावकारी काम गरेको बताउँदै नयाँ आउने समितिको पनि सक्रियताको शुभकामना व्यक्त गर्नुभयो । उहाँले सम्पूर्णलाई पदस्थापन गराउनु भयो ।
दमकमा लायन्य र लियोका गतिविधिले व्यक्तित्व र नेतृत्व विकाससँगै समाजसेवाका प्रभावकारी काम भएको लायन्स क्लब अफ बिग बुद्धका नवनिर्वाचित अध्यक्ष आनन्द थापाले अनुभूति प्रस्तुत गर्नुभयो । उहाँले गएको वर्ष ८५ वटा कार्यक्रम गरेर बिग बुद्धले लायन्सको प्रभाव झल्काएको बताउँदै आफ्नो कार्यकालमा पनि सवैको सहकार्यमा अघि बढ्ने जनाउनु भयो ।
दमकमा २ दर्जनको संख्यामा रहेका लायन्स र लियोका क्लबहरुले व्यक्तित्व र नेतृत्व विकाससँगै समाजसेवाको क्षेत्रमा समन्वयतात्मक रुपले अझ सक्रियता जनाउँदै जान सके यी क्लब आउने पुस्ताका लागि सृजनशीलताको आधारशीला बन्ने देखिन्छ ।
