दमक, १२ साउन /दमक नगरपालिका कार्यालयले सधैंको टाउको दुखाईको विषय बनिरहेको फोहोरमैला व्यवस्थापनको दिगो उपाय खोज्न सरोकारवालासँग शुक्रबार छलफल गरेको छ ।
नगरको वातावरण तथा विपद् व्यवस्थापन समितिको आयोजनामा सम्पन्न वातावरण तथा फोहोरमैला सम्बन्धी विशेष छलफल कार्यक्रममा विभिन्न दल तथा संघ संस्थाका प्रतिनिधिले सुझाव राखेका छन् ।
यसक्रममा दमक उद्योग वाणिज्य संघका अध्यक्ष देवीप्रसाद गुरागाईं ( गोपाल) ले नगरमा कानुन बनाएर पनि कार्यान्वयनमा जान नसकिरहेकाले फोहोरमैलाको व्यवस्थापनमा कठिनाई भइरहेको जनाउनु भयो ।
कार्यक्रममा रुबल अधिकारीले सडक किनारामा विरुवा रोप्ने भन्ने विषय स्पष्ट नभएको ज्ञिजासा राख्नु भयो ।
सो अवसरमा सामाजिक अगुवा काँशी खाती, हेम सुवेदी र सुरेन्द्र प्रधानले पनि फोहोर व्यवस्थापनका बारेमा सुझाव प्रस्तुत गर्नुभयो ।
दमक नगर क्षेत्रको फोहोर व्यवस्थापनको जिम्मा पाएको नेक्स्ट इरा इनर्जी प्रालिका प्रवन्धक विमल खतिवडाले वर्षाका कारण फोहोर व्यवस्थापनमा समस्या भएको जनाउँदै प्रत्येक नागरिकले फोहोर व्यवस्थापनमा सहयोगी भूमिका निर्वाह गर्नुपर्नेमा जोड दिनुभयो ।
नगरपालिकाको वातावरण तथा विपद् व्यवस्थापन समितिका संयोजक एवम् ६ नम्बर वडाध्यक्ष टेकबहादुर थापाले फोहोर सहित वडाको समग्र व्यवस्थापनका लागि कडाईका साथ पालना गर्नुपर्ने नियम बारेमा जानकारी गराउनु भयो ।
सो कार्यक्रममा उठेका प्रश्न र सुझावको जवाफ दिनेक्रममा बोल्दै नगर प्रमुख राम कुमार थापाले सबैको सहकार्यमा फोहोर व्यवस्थापन गरी वातावरण संरक्षणमा अघि बढ्न सकिने धारणा राख्नुभयो ।
कार्यक्रममा नगर उपप्रमुख रेगिना भट्टराई प्रसाईंले पनि फोहोरलाई छुट्याएर राखिदिने गर्नाले फोहोरको व्यवस्थापनमा सहजता हुने बताउँदै मन्तव्य व्यक्त गर्नुभयो ।
फोहोरको उचित व्यवस्थापन गरी नगरलाई स्वच्छ बनाउने कुरामा स्वयम् नगरवासी समेत सक्रिय र सचेत रहँदै नगरपालिकालाई घच्घच्याउनु आवश्यक देखिन्छ ।
