अमेरिका, २९ साउन/ अमेरिकाको पेन्सिलभेनियामा स्थापित त्रिवेणी साहित्य मञ्चले नेपाली भाषामा लेखिएका लघुकथाहरूको संग्रह प्रकाशन गर्ने तयारी गरेको छ ।
मञ्चले विश्वमा रहेका नेपालीहरूले नेपाली भाषामा लेखिएका उत्कृष्ट लघुकथाहरूलाई एकसाथ संकलन गरी पुस्तकको रूपमा प्रकाशन गर्न लागेको त्रिवेणी साहित्य मञ्च अध्यक्ष केशव बैरागी माइलोले जानकारी गराउनु भएको त्यहाँस्थित हाम्रा सहयोगी पत्रकार अर्जुन प्रधानले जनाउनु भयो ।
यस संग्रहमा समावेश गर्न चाहने लेखकहरूले आफ्ना मौलिक र अप्रकाशित २५० शब्दसम्मका लघुकथाहरू असोज मसान्तसम्ममा पठाउन मञ्चले सूचनामार्फत अनुरोध गरेको छ । सामाजिक सद्भावलाई प्रोत्साहन गर्ने खालका विषयवस्तुहरूलाई प्राथमिकता दिइने सूचनामा उल्लेख गरिएको छ ।
मञ्चले सन् २०१७ मा स्थापना भएदेखि नै नेपाली भाषा, साहित्य, र संस्कृतिको संरक्षण र प्रवद्र्धन गर्दै आइरहेको सचिव नारद आचार्य सुदामाले बताउनु भयो ।
