दमक, ३२ साउन । सोलुखुम्बु जिल्लाको खुम्बु पासाङ ल्यहामु गाउँपालिका ५ मा पर्ने खुम्बु थामे क्षेत्रमा हिमताल फुटेर आएको बाढीले १४ घर बगाएको छ ।
शुक्रबार दिउँसो हिमताल फुट्दा लेदो सहितको बाढीबाट एउटा विद्यालय, ३ वटा क्लिनिकसहित १४ वटा घरमा पूणर् क्षति भएको र ७ वटा घर उच्च जोखिममा रहेको सोलुखुम्बुका प्रमुख जिल्ला अधिकारी देवी पाण्डे खत्रीले जानकारी दिनुभयो । मानवीय क्षतिको विवरण यकिन नभएको बताउनु भयो ।
त्यहाँस्थित पालिकाहरुले सूचना जारी गर्दै दूधकोशी सहितका नदी किनारका वस्ती जोखिममा रहेको भन्दै उच्च सतर्कता अपनाउन आग्रह गरेका छन् । घटनास्थलमा नेपाली सेनासहितको टोली पुगेर जोखिम क्षेत्रका सर्वसाधारणलाई सुरक्षित स्थानमा सार्ने काम भइरहेको छ ।
