दमक, १ भदौ ।
तरबारबाट आफ्नो सीमा तोक्न नखोज ।
संसार जित्ने कमललाई रोक्न नखोज ।
पूर्वका पुराना गजलकार भूपेन्द्रराज तिम्सिनाले शुक्रबार दमक ९ स्थित सरस्वती माद्यमिक विद्यालय इटाभट्टाका विद्यार्थीमाफ यो गजल शेर सहित सृजनात्मक प्रस्तुति दिनु भयो । विद्यार्थीहरुलाई किताबी ज्ञान भन्दा बाहिरका सृजनशील विषयका बारेमा जानकारी गराउन विद्यालयले सञ्चालन गरेको ‘बुक फ्रि फ्राइडे’ कार्यक्रममा उहाँले सृजनशील कसरी बन्ने भन्ने विषयको यसरी उठान गर्नु भएको थियो ।
सो कार्यक्रम अन्तर्गत उज्यालो खबरका सम्पादक समेत रहनुभएका तिम्सिनाले उद्घोषणकला सहित सृजनात्मक अभिव्यक्तिका बारेमा जानकारी गराउनु भयो । पत्रकार चिरञ्जीवि घिमिरेले पत्रकारिता, नाट्यकर्मी दीपक खरेल र पूर्व विद्यार्थी गंगा खतिवडाले नाटक, प्रवीण पाठकले प्रभावकारी अभिव्यक्ति, विवेक निरौलाले हस्त लेखन, कृष्ण साहले नृत्य र निशा नेपालीले गायनका बारेमा जानकारी प्रस्तुत गरेर विद्यार्थीहरुलाई सृजनशीलताप्रति उत्सुक बनाउने काम गर्नुभयो ।
सानिमा बैंक दमकका अपरेशन म्यानेजर रोशन खड्काले बैंकको डिभिटल सेवाका बारेमा उल्लेख गर्दै प्रविधिको सही सदुपयोगमा ध्यान दिनुपर्ने विषय औंल्याउनु भयो ।
विद्यालयले विभिन्न क्षेत्रका जानकारहरुलाई आमन्त्रण गरेर प्रत्येक शुक्रबार अतिरिक्त सिकाईमध्येमा पनि जीवनका लागि बढी महत्व राख्ने विषयमा केही सिकाईको कोशिषमा कार्यक्रमको थालनी गरेको छ । विद्यार्थीलाई कितावी ज्ञानभन्दा बाहिरको परिवेश व्यवहारिक तबरले बुझ्न मद्धत पुर्याउने ठानेर ‘बुक फ्रि फ्राइडे’ सुरु गरिएको प्रधानाध्यापक सिताराम ढकालले बताउनु भयो ।
विद्यालयले शिक्षक लोकनाथ गजुरेलको संयोजकत्वमा ‘बुक फ्रि फ्राइडे’ समिति गठन गरी विभिन्न विषयका बाहिरी ज्ञान प्रदान गर्ने कार्य थालनी गरेको हो । समितिको सदस्यमा हिम्मत खड्का र लक्ष्मण पाण्डे रहनु भएको छ ।
सरस्वती माविको पूृर्व विद्यार्थी समाजका अध्यक्ष प्रेम कुँवर सहितका अगुवाहरु समेत कार्यक्रममा उपस्थित भएर विद्यार्थीलाई बाहिरी ज्ञान लिनमा प्रोत्साहित गर्नुभयो ।
शिक्षालयमा पठनपाठन गर्नुभनेको किताबमात्र पठाउनु होइन । पाठ्यपुस्तकको विषय सहित सृजनात्मक र व्यवहारिक ज्ञान समेत दिनु आजको सिकाईको आवश्यकता हो । यसमा पनि सामुदायिक विद्यालयले थालेको यसखाले कार्यक्रमले सिकाईलाई थप प्रभावकारी बनाउने देखिन्छ ।
