दमक,भदौ १९
शिक्षा सेवी तथा सामाजिक अभियन्ता दुर्गा अधिकारीले लेख्नु भएको जीवनी तथा यात्रा सस्मरण पुस्तक ‘रित्तो झोला’को विमोचन गरिएको छ ।
दमक ९ क्याम्पसमोडस्थित निजी निवासमा सोमबार एक औपचारिक कार्यक्रमको आयोजना गर्दै सो पुस्तकको कोशी प्रदेशसभा सदस्य होमबहादुर थापा, दमक नगरपालिकाका पूर्व प्रमुख रोमनाथ ओली, प्राध्यापक मोहन भण्डारी, साहित्यकार दुर्गा देवी काफ्ले लागायतले संयूक्त रुपमा विमोचन गर्नु भएको हो ।
कोशी प्रदेशसभाका प्रदेश सभा सदस्य होम बहादुर थापाले पुस्तक विमोचनमा आफ्ना शुभकामना राख्दै भन्नु भयो ‘पुस्तक रित्तो झोला’ बास्तवमा रित्तो छैन । यहाँ जीवनको दर्शन छ । जीवनको उतारचढावबारेको चर्चा छ । देश र विदेशको अनुभव छ । त्यसैले पनि यो पुस्तक सबैकालागि महत्पूणर् र सान्दर्भिक छ । ’
कार्यक्रममा विषेश अतिथि दमक नगरपालिकाका पूर्व प्रमुख रोमनाथ ओलीले पुस्तकको नाम रित्तो झोला भनिएपनि जीवन परिवर्तन गर्न सक्ने थुप्रै कुरा यसभित्र रहेको उल्लेख गर्नु भयो । मान्छे रित्तै जन्मन्छ र रित्तै मृत्यु हुन्छ भन्ने कुराको चरितार्थ सो पुस्तकले गरेको उल्लेख गर्दै त्यसबीचमा गरिएका संघर्ष चाँही महत्वपूर्ण संग्रह रहेकोले पुस्तकको खास महत्व रहेको बताउनु भयो ।
विमोचनपछि बोल्दै सो पुस्तकलाई अन्तिम रुप दिन अथक प्रयास गर्नु भएका र पाण्डुलिपिको अध्ययन गर्नु भएका प्राच्य विज्ञान प्रतिष्ठानका अध्यक्ष एवं दमक बहुमुखी क्याम्पसका पूर्व क्याम्पस प्रमुख प्राध्यापक मोहन भण्डारीका अनुसार पुस्तकमा जीवनको बुझाई, गहिराई र सिङ्गो अनुभव रहेकोले सबैकालागि एउटा प्रेरणाको श्रोत बन्न सक्ने उल्लेख गर्नु भयो ।
साहित्यकार काफ्लेले भन्नु भयो ‘लेखक अधिकारी सेवा निवृत्त शिक्षक, शिक्षण पेशाबाट अवकास लिएका प्राय व्यक्तिहरु सिर्जशील भएको पाइएको छ । यो उहाँको छैटौ कृति हो । ‘रित्तो झोला’ले जीवनको संघर्ष, अनुभव र प्राप्ति लगायतका कुरालाई राम्रोसँग व्याख्या गरेको छ ।’
पुस्तकको भाषा सम्पादन देवराज अधिकारीले गर्नु भएको छ भने यसको प्रकाशक सुस्मा तिम्सिना पोखरेल रहनु भएको छ । पुस्तकको बजार मुल्य २ सय ५० रुपैँया निर्धारण गरिएको छ ।
