दमक, २० भदौ । भाद्र शुक्ल तृतीयाका दिनमा मनाइने हरितालिका (तिज) पर्व आज देवादिदेव महादेवको पूजा आराधना गरी मनाइएको छ ।
भाद्र शुक्ल तृतीयामा व्रत बसी शिव पार्वतीको पूजा, उपासना गरेमा पारिवारिक सुख, शान्ति र कल्याणको प्राप्ति हुने धार्मिक विश्वास छ ।
धर्मशास्त्रीय रुपमा महिला र पुरुष दुवैले तिजको व्रत गर्नुपर्ने भएपनि सामाजिक चर्चा भने महिलाले श्रीमानको दीर्घायुको कामनाका लागि गर्ने बुझाइ छ।
व्रत गर्ने पुरुषले विधुर हुनु नपर्ने, नारीले अटल सौभाग्य र अविवाहित पुरुष, महिलाले गुण सम्पन्न वर वा वधु पाउने शास्त्रीय वचन रहेको धर्मशास्त्रविद्हहले बताएका छन ।
सत्ययुगमा हिमालय पुत्री पार्वतीले गौरीघाटमा बसी तपस्या गरेर महादेवलाई पति पाउने वरदान पाएको विश्वासमा यो व्रत सुरु भएको पौराणिक मान्यता छ । संस्कृत भाषाका ‘हरित’ र ‘आलिका’ दुई शब्द मिलेर हरितालिका शब्द बनेको छ । जसमा ‘हरित’ शब्दको अर्थ हरण गरिएको र ‘आलिका’ शब्दको अर्थ साथी भन्ने हुन्छ ।
बिहीबार दर खाएपछि औपचारिक रुपमा सुरु हुने तिज पर्व ऋषि पञ्चमीसम्म मनाइन्छ । तृतीयाका दिन हरितालिका व्रत, चौँथीका दिन, गणेशको पूजा र पञ्चमीका दिन स्नान गरी अरुन्धतीसहित सप्तऋषिको पूजा गरेर तिज समापन हुन्छ । तिजलाई नेपाली नारीले मौलिक पर्वका रुपमा मनाउने गरेका छन् ।
यही क्रममा झापाको दमकमा पनि केहि ठाउँमा औपचारिक कार्यक्रमको आयोजना गरी तिज मनाइएको छ ।
दमक ९ स्थित क्याम्पसमोडमा गीत, नृत्य, भजन, सङ्गीनी तथा कविता वाचनको प्रतियोगितानै गराएर तिज मनाइएको छ ।
अखिल नेपाल महिला संघ वडा नं ९ र दिदी बहिनी बचत समूहको संयूक्त आयोजनामा सामूहिक नृत्य सहित तिज मनाइएको छ ।
प्रतियोगितामा सहभागी भएर उत्कृष्ट भएकाहरुलाई पुरस्कारको पनि व्यवस्था गरिएको अनेम सघं कोशी प्रदेश सचिवालय सदस्य दुर्गा खनाल काफ्लेले जानकारी दिनु भयो ।
यस्तै दमक ५ मा रहेको धनेश्वर शिव पाञ्चायन मन्दिरमा पनि तिजको कार्यक्रम गरिएको छ । ब्रतालुहरुको उल्लेख्य उपस्थितीमा खुला रुपमा नाचगानका साथै मनोरञ्जनात्मक कार्यक्रम समेत मन्दिरमा गरिएको मन्दिर व्यवस्थापन समितिका अध्यक्ष रुद्र कार्कीले जानकारी दिनु भयो ।
यसै गरी दमक ६ स्थित पशुपति मन्दिरमा राष्ट्रिय गायिका कोमल वलीको उपस्थीतीमा भव्य तिज कार्यक्रम सम्पन्न भएको छ । उहाँले बिभिन्न तीज गीत गाउँदै सहभागी ब्रतालुहरुलाई नचाउनु भएको थियो भने आफुले समेत मञ्चबाटै नृत्य गर्नु भएको थियो ।
उल्लासमय उपस्थिती रहेको पशुपति मन्दिरमा गायिका ओली फर्केसकेपछि पनि ब्रतालुहरुले धुमधामकासाथ नृत्य गर्दै तिज मनाएका थिए ।
