पथरी, २७ भदौ । मोरङको पथरी शनिश्चरे नगरपालिकामा सामुदायिक विद्यालयको शैक्षिक स्तर वृद्धि गर्न नगरले २४ वटा सूचकमा आधारित रहेर विद्यालयका प्रधानाध्यापकहरुसँग सम्झौता गरेको छ ।
बिहीबार शिक्षा, युवा तथा खेलकुद शाखाको आयोजनामा पथरी शनिश्चरे नगरपालिकाको हलमा प्र.अ. तथा शिक्षा शाखाबीच कार्यसम्पादन करार सम्झौता कार्यक्रम भएको हो । नगरको सामाजिक विकास समितिका अध्यक्ष जीवन खतिवडाको अध्यक्षतामा भएको सो कार्यक्रममा शिक्षा शाखा प्रमुख नवीन खुलालले सामुदायिक विद्यालयको शैक्षिक स्तर वृद्धि गर्न नगरले प्र.अ.हरुसँग २४ वटा सूचकमा आधारित रहेर सम्झौता गरेको बताउनु भयो ।
यसैगरी, कार्यक्रममा कक्षा १ देखि ५ सम्म अध्ययन गर्ने विद्यार्थीहरूले हासिल गर्नुपर्ने न्यूनतम मापदण्ड तयार गरी सबै विद्यालयमा वितरण गरिएको थियो ।
कार्यक्रममा, प्रमुख प्रशासकीय अधिकृत शशि राई, वडा नम्बर ७ का वडाध्यक्ष उद्धवराज बस्नेत, स्वास्थ्य शाखा प्रमुख मुरारी आचार्य, विद्यालयका प्र.अ. तथा विद्यालय व्यवस्थापन समितिका अध्यक्षहरुको उपस्थिति रहेको थियो ।
