झापा, ३० भदौ/
नेकपा एमालेका अध्यक्ष तथा प्रधानमन्त्री केपी शर्मा ओलीको गृह जिल्लामा आएर माओवादी केन्द्रका अध्यक्ष पुष्पकमल दाहालले विभिन्न पार्टी परित्याग गरेकाहरुलाई आफ्नो पार्टीमा प्रवेश गराउनु भएको छ ।
बिर्तामोडमा सम्पन्न भएको राजनैतिक प्रशिक्षण तथा पार्टी प्रवेश कार्यक्रममा उहाँले २ सय बढीलाई पार्टी प्रवेश गराउनु भएको बिर्तामोडको प्रतिदिन दैनिकले लेखेको छ ।
प्रतिदिनका अनुसार पुराना वाम बुद्धिजीवीका रुपमा परिचित लोकबन्धु कन्दङ्वा सहित अन्य व्यक्तिहरु माओवादीमा प्रवेश गर्नुभएको छ ।
कन्दङ्वा तत्कालिन अनारमनि नगरोन्मुख गाविसका भएको समयमा काम गर्नु भएको थियो ।
कन्दङ्वासँगै सामाजिक अभियन्ता गोपाल मुखिया, एमाले जिल्ला सदस्यहरु मोहन योगी, सीता रणपहेली, जगत राई , संघीय लोकतान्त्रिक राष्ट्रिय मञ्चका जिल्ला सदस्य बिरेन्द्रकुमार याक्थुङवा, जनता समाजवादी पार्टीका प्रदेश सदस्य मणि राई, झापा बिद्रोहका सहिद परिवार नरेन्द्र घिमिरेलगायत करिव २ सय जना पार्टी प्रवेश गरेको जनाइएको छ ।
नेकपा माओवादी केन्द्रका अध्यक्ष तथा पूर्व प्रधानमन्त्री दाहाल, उपमहासचिव तथा १ नम्बर प्रदेश इञ्चार्ज हरिबोल गजुरेल (शितलकुमार) ले उहाँहरुलाई पार्टीमा स्वागत गर्नुभएको थियो ।
यस्तै पूर्वाञ्चल दैनिकले लेखे अनुसार ‘प्रचण्ड’ ले सरकार बनाउने र भत्काउने खेलमा माओवादी पार्टी नलाग्ने बताउनु भएको छ ।
माओवादी केन्द्र झापाले बिर्तामोडस्थित सिटी सेन्टरमा आयोजना गरेको राजनीतिक प्रशिक्षण तथा पार्टी प्रवेश कार्यक्रमलाई सम्बोधन गर्नु हुँदै अध्यक्ष प्रचण्डले अब माओवादी सरकारमा जाने र नयाँ समीकरण बनाउने खेलमा नलाग्ने बताउनुभयो । माओवादी अब जनतासंग जाने र जनतालाई संगठित गर्दै अघि बढ्ने अध्यक्ष दाहालको भनाई छ ।
नेकपा एमाले र नेपाली कांग्रेसलाई २०८४ सालसम्म नै मिल्न र सरकार सञ्चालन गर्न शुभकामना दिएको बताउनु भएका अध्यक्ष दाहालले फेरि ‘प्रचण्ड जी मिल्न प¥यो’ भन्दै नआउन आग्रह गर्नुभयो ।
