पथरी, १ असोज । मोरङको पथरी शनिश्चरे १, जाँते मोडमा रहेको प्रस्तावित रंगशालामा असोज ५ देखि १२ गतेसम्म सञ्चालन हुने पथरी शनिश्चरे गोल्डकपको तयारी पुरा हुँदै आएको छ ।
पथरी ११ फुटबल क्लबको आयोजनामा ए डिभिजनका ८ टिमको सहभागिताको प्रतियोगिताको तयारी अन्तिम चरणमा पुगेको मंगलबार पत्रकार सम्मेलनमा जानकारी दिइएको छ ।
‘ए’ डिभिजनका राष्ट्रिय फुटवल टिम संकटा फुटबल क्लब काठमाडौँ, ब्रिगेड ब्वाइज क्लब काठमाडौँ, सलहेश यूवा क्लब सिरहा, यूकेएफसी भारत, धरान सिटी फुटबल क्लब सुनसरी, पाँचथर क्लब फिदिम, झापा ११ फुटबल क्लब र आयोजक इन्ट्रा पथरी– ११ फुटबल क्लब गरी जम्मा ८ वटा टिमले प्रतियोगितामा भाग लिने खेल संयोजक जितन राईले जनाउनु भयो ।
प्रतियोगिताको मुख्य सहयोगीको रूपमा पथरी शनिश्चरे नगरपालिका र इन्ट्रा इन्टरनेसनल फाउण्डेशन अफ अमेरिका भएको जनाउँदै आयोजक समितिका अध्यक्ष सुमन विकले प्रतियोगिताको प्रथम र दोस्रो स्थान हासिल गर्ने टिमलाई क्रमशः ३ लाख र दुई लाख रुपैयाँ, मेडल, ट्रफी प्रदान गरिने बताउनु भयो ।
प्रथम पुरस्कार हाल अमेरिकमा बस्दै आएका सिजर एण्ड सिस्टर नेपाल प्रतिनिधिसँग यस अघि संझौता भएको थियो । प्रतियोगिताका उत्कृष्ट खेलाडी, उत्कृष्ट गोलरक्षक, उत्कृष्ट डिफेन्स, उत्कृष्ट मिडफिल्डर, उत्कृष्ट स्ट्राइकर, उत्कृष्ट प्रशिक्षक र सर्वाधिक गोलकर्तालाई पनि जनही नगद १० हजार सहित मेडल र ट्रफीले पुरस्कृत गरिने अध्यक्ष विकले जनाउनु भयो ।
प्रत्येक खेलमा म्यान अफ दी म्याच घोषित खेलाडीलाई जनही ५ हजार रूपैयाँ, मेडल र ट्रफीले पुरस्कृत गरिनेछ ।
