दमक, असोज २७
घास काट्न हिडेका एकजना पुरुषलाई दमकमा हात्तीले आक्रमण गरेको छ ।
दमक ३ स्थित ढुंगे सडक खण्डमा घास काट्न हिडेका ५० वर्षीय अभिनारायण खत्रीलाई आज बिहान करिव साढे ६ बजे आक्रमण गरेको दमक ३ का वडाध्यक्ष नवीन बरालले जानकारी दिनुभयो ।
‘उहाँको टाउको, ढाड र कम्मरमा गहिरो चोट लागेको छ । हामीले तत्कालै उपचारकालागि बिर्तामोडको बीएण्डसी अस्पतालमा पठाएका छौ ।’ वडाध्यक्ष बरालले उज्यालो खबरलाई जानकारी दिदै भन्नु भयो ।
घाइतेको अवस्था हेर्दा हात्तीको सुडले बेरेर फ्याक्दा निकै पर बजारिएर यस प्रकारको गहिरो चोट लागेको हुन सक्ने उहाँको भनाईं छ ।
प्रहरी मुचुल्का बनाई घाईतेलाई उपचारकालागि पठाइसकिएको छ । यो क्षेत्रमा केहि दिनदेखि १७ वटा हात्ती प्रवेश गरेको र बालीनालीमा निरन्तर क्षती समेत गरिरहेको छ ।
दमकको यो क्षेत्र हात्तीबाट प्रताडीत क्षेत्र हो । यहाँ नजिकै हंसे दुम्से सामुदायिक वन र हात्ती हिड्ने रुट समेत रहेकोले पनि यो क्षेत्र हात्ती प्रभावित क्षेत्र रहेको वडाध्यक्ष बरालले जानकारी दिनुभयो । हात्तीको सास्ती हटाउन तीनतहकै सरकारसग दीर्घकालीन उपायबारे छलफल भइरहेको पनि जानकारी दिनुभयो ।
