धरान, कार्तिक २
सुनसरीको धरान उप-महानगरपालिका अहिले चर्चामा छ । यहाँका मेयर हर्कराज साम्पाङले आफ्नो कार्यकक्षमा ताला लगाएर युके हिँडेपछि यहाँको चर्चा थप बढेको हो ।
यसरी मेयरको कार्यकक्षमै ताला लगाइएपछि कार्यवाहक मेयरको जिम्मेवारी पाउनु भएका लोकेन्द्र फागो कार्यकक्ष बाहिर नगर प्रमुखको सहयोगीहरू बस्ने कोठामा बस्नु भएको छ
।
नगर प्रमुख साम्पाङले कार्यकक्षमा ताला लगाएको मात्र होइन, ताला तोडेर कोही पस्छ भने झैँ ढोकामा सोफा समेत तेर्साएर आफु यूके भ्रमणमा निस्कनु भएको छ ।
यसअघिका कार्यवाहक प्रमुखहरू नगर प्रमुखकै कार्यकक्ष भित्र बसेर दैनिक जिम्मेवारी पुरा गर्दथे ।
उपमहानगरपालिकाका कर्मचारीहरू अनुसार कार्यवाहक प्रमुख कार्यकक्ष भित्रै बस्ने तर प्रमुखको कुर्सीमा बस्दैनथे प्रमुखकै कुर्सी छेउमा अर्को कुर्सी राखेर बस्ने गर्दथे ।
