दमक, कार्तिक ४
दमक नगरपालिका वडा नम्बर ४ को कार्यालय । यहाँ सेवाग्राहीको भिड लागेको छ । वडाबाट प्रवाह हुने सेवा लिनेको भन्दा पनि राष्ट्रिय परिचयपत्र लिन आउनेको भिड हो यो ।
यही भिडमा भेटिनु भएका ७९ वर्षीय कटकबहादुर धिमाल सिटी सफारी चढेर आफ्नो परिचयपत्र लिन आउनु भयो । मध्यान्हको १२ बजेसम्म पनि राष्ट्रिय परिचयपत्र बाढ्ने कर्मचारी नआएपछि उहाँ फर्कने सुरुमा रहेको बताउनु हुन्छ ।
दमक नगरपालिकाले कार्तिक १ गते नै कार्तिक ४ गते वडा वडामा राष्ट्रिय परियचयपत्र वितरण गरिने भन्दै सार्वजनिक सूचना जारी गर्यो । सबैलाई भौतिक रुपमै उपस्थित भएर आआफ्नो राष्ट्रिय परिचयपत्र लिन सूचना गरिएको भएपनि सो दिन कसैले पनि परिचय पत्र पाउनै सकेनन् । सेवाग्राही अग्निप्रसाद उप्रेती र पवित्रा भुजेल पनि उसैगरी हस्स पर्नुभयो ।
यसरी बिना पूर्व तयारी कुनै व्यवस्थापन बिना नै सूचना आह्वान गर्दा सेवाग्राहीले एक दिन अनाहकमै दुःख पाए । सेवाग्राहीले वडा कार्यालयमा आएर जनप्रतिनिधि र कर्मचारीलाई र्याख्र्याख्ती पार्दै आफ्नो राष्ट्रिय परिचयपत्र मागिरहेका थिए । वडा नम्बर ४ का वडाध्यक्ष पुण्यप्रसाद दाहाल भन्नु हुन्छ ‘नगर प्रमुख ज्यूको एकलौटी निणर्यले जनताले दःुख पाए ।’ वडाध्यक्षहरुलाई समेत व्यवस्थापन गर्ने जानकारी पनि नगराई सार्वजनिक सूचना निकाल्दा जनताले दुख पाएको उहाँको भनाई छ ।
यता वडा नम्बर ५ र १० मा भने कर्मचारी पुगेर पारिचयपत्रको सर्टिङ गरिरहेका थिए । हरेक वडामा ५ हजार भन्दा बढीलाई यो परिचयत्र बाँढिदैछ । वणर्ानुक्रम अनुसार मिलाएर राख्नै पनि समय लाग्ने भएकोले अझै केही दिनसम्म बाढ्न नसकिने जिल्ला प्रशासन कार्यालय मार्फत राष्ट्रिय परिचयपत्र बाढ्न खटाइएका कर्मचारी जयकला गुरुङले समस्या दर्शाउनु भयो ।
सबै सर्टिङ गरिसकेपछि टोल टोलसँग समन्य गर्दै फेरि अर्को सूचना जारी गर्ने तयारीमा वडाहरु रहेका छन् । अव वडाले कहिले र कस्तो सूचना जारी गर्छ सोही अनुसार मात्रै राष्ट्रिय परिचयपत्र लिन आउनु पर्ने वडा नम्बर १० का अध्यक्ष राजेन्द्र भण्डारी र ५ का कार्यवाहक अध्यक्ष खड्ग राईले उल्लेख गर्नुभयो ।
यता दमक नगरपालिका वडा नम्बर ६ ले भनें कुन दिन कुन टोलले राष्ट्रिय परिचयपत्र लिन आउने भनेर सार्वजनिक सूचना निकाली सकेको छ । यहाँ कार्तिक ५ गते देखि मंसिर ३ गतेसम्ममा परिचयपत्र लिन आउन टोलको नाम र मिति नै किटान गरेर सार्वजनिक सूचना प्रकाशन गरिसकेको छ ।
