पथरी, कार्तिक ११
उत्तरपूर्वी मोरङको पथरी शनिश्चरेमा मौलिक संस्कृतिको जगेर्नाको उद्धेश्यले तिहारका अवसरमा ‘मौलिक देउसी भैलो प्रतियोगिता’ आयोजना गरिएको छ ।
पथरी शनिश्चरे ३ स्थित विरेन्द्रनगर आइतबारेका युवाहरुको आयोजनामा कार्तिक १३ गते स्थानीय जनता माद्यमिक विद्यालयमा सामूहिक मौलिक देउसी भैलो प्रतियोगिता गरिने समूहका अगुवा हेमन्त ओझाले जनाउनु भयो । जहाँ मौलिक भेषभुषा सहितको प्रस्तुति रहने प्रावधान बनाइएको छ ।
तिहारमा देउसी भैलो खेल्ने गरिएपनि मौलिक देउसी भैलोभन्दा फरक र दक्षिणा केन्द्रित कार्यक्रमको विकृति बढ्दै गएपछि मौलिक संस्कृति जोगाउने सन्देशका लागि यसखाले प्रतियोगिता गरिएको उहाँले बताउनु भयो । जसमा पथरी शनिश्चरे समाज युएईले मुख्य सहयोग पुर्याउनेछ ।
