दमक, कार्तिक २४
जापानमा यूवाहरुको मानव तस्करी गरेको आरोप लागेका कोशी प्रदेशका नि-वर्तमान आन्तरिक मामिला तथा कानुन मन्त्री लिलाबल्लव अधिकारीलाई नेकपा एमाले पार्टीले संगठित सदस्य समेत नरहने गरी कार्वाही गरेको छ ।
पार्टिको प्रदेश कमिटीको आज बसेको बैठकले नेकपा (एमाले) को तर्फबाट मोरङ जिल्लाको प्रतिनिधिसभा निर्वाचन क्षेत्र नं २ को प्रदेश सभा निर्वाचन क्षेत्र (ख) बाट निर्वाचित प्रदेशसभाका सदस्य तथा प्रदेश सरकारका आन्तरिक मामिला तथा कानुन मन्त्री अधिकारीले बैदेशिक भ्रमण सम्बन्धीका आवश्यक मापदण्ड तथा प्रक्रियाहरु समेतको बेवास्ता गरेको भन्दै पदीय मर्यादा विपरीत काम गरेकोले कार्वाही गरिएको जनाएको छ ।
अध्यक्ष घनश्याम खतिवडाले हस्ताक्षर गरेको बिज्ञप्तिमा भनिएको छ ‘नेकपा (एमाले) अविचलित रुपमा कानुनी शासनको पक्षमा उभिदै आएको जिम्मेवार पार्टी भएको नाताले वहाँले गर्नुभएको भ्रमणसंग जोडिएर लागेको मानव तस्करी जस्तो गंभिर आरोपका सम्बन्धमा शिघ्र छानबिन तथा गहिरो अनुसन्धान गरी सत्य तथ्य सार्वजनिक गर्न नेपाल सरकार र सम्बन्धित निकायको गंभिरतापूर्वक ध्यानाकर्षण गराउदै माननीय श्री लिलाबल्लव अधिकारीलाई उपरोक्त आरोपको अन्तिम निरुपण नभएसम्मको लागि पार्टीको कुनैपनि तहमा रहन नपाउने गरी वहाँलाई राष्ट्रिय महाधिवेशन प्रतिनिधि परिषद सदस्य तथा नेकपा (एमाले) को संगठित सदस्यताबाट समेत निलम्वन गरिएको जानकारी गराइन्छ ।’
