सुनसरी, कार्तिक २६
सुनसरी सदरमुकाम इनरुवा-१ का अर्जुन पौदार बिहानै ५ बजे इनरुवाको मुख्य बजारस्थित सुपरमार्केमा ठेला लिए आइपुग्नुहुन्छ ।
ठेलामा माटोका भाडामा पानी, चनाको सातु, प्याज र कागती हुन्छ। उहाँको ठेला देख्नेबित्तिकै सातु पिउने मानिसको भीड हुन्छ।
उहाँले भन्नुभयो , ‘ठेला राम्रो छैन तर ग्राहक सातु खुवाएर सन्तुष्टि छन्। सातु बिक्री गरेर मासिकरुपमा ५० हजार रुपैयाँ आम्दानी हुन्छ।’
गर्मीयामका बेलामा एक लाख मासिक कमाउने गरेको र चिसोको बेलामा अलि कम आम्दानी हुने गरेको उहाँले बताउनु भयो ।
चिसोका बेलामा दैनिक रुपमा एक सयदेखि एक सय ५० गिलाससम्म सातु बिक्री हुने गरेको छ भने गर्मीका बेलामा दुई सयदेखि दुई सय ५० गिलाससम्म सातु बिक्री हुने हुने गरेको उहाँले सुनाउनु भयो ।
उहाँले करिब पाँच वर्षदेखि इनरुवाको मुख्य बजारमा सातु बिक्री गर्दै आउनु भएको छ। उहाँले विगतका वर्षमा विभिन्न व्यापार गर्दा असफलता प्राप्त भएकामा यस व्यापारले राम्रो फाइदा हुने गरेको बताउनुभयो ।
दैनिक रुपमा सामग्री महगिँदै गएका बेलामा प्रति गिलास सातुको ४० लिने गरेको उहाँको भनाइ छ। दैनिक रुपमा चार हजारदेखि पाँच हजार रुपैयाँसम्मको बिक्री हुने गरेकोमा खर्च कट्टा गरेर मासिक रूपमा ५० हजारदेखि ६० हजार रुपैयाँसम्म आम्दानी हुने गरेको पौदारले जानकारी दिनुभयो ।
एक लाखदेखि दुई लाख खर्च गरेर विदेशमा गएर ४० देखि ५० हजार रुपैयाँ आम्दानी गर्दै आएकोमा आफू सोही बराबरको लगानीमा घरमै बसेर राम्रो आम्दानी गर्दै आएको उहाँले प्रतिकृया दिनुभयो ।
उहाँले भन्नुभयो, ‘स्वदेशमै काम गरे वैदेशिक रोजगारीका लागि अर्काको देशमा पसिना बगाउनुपर्दैन।’
