दमक, मंसिर १
दमक जेष्ठ अभिभावक संघले गएको तिहारमा देउसी भैलोको कार्यक्रम गरेको थियो ।
आफ्नै सदस्य तथा सुभचिन्तकहरुकहाँ गएर आफ्नो साँस्कृतिक पर्वको संरक्षण गर्ने उद्धेश्यले खेलिएको देउसीबाट केही रकम दक्षिणा स्वरुप संकलन पनि भएको थियो ।
समाजले त्यहाँ संकलित ३१ हजार रुपैँया दक्षिणा दमकमा रहेको रत्न जेष्ठ बृद्धाश्रममा गएर सेवाको कार्यक्रम गरी खर्च गरेको छ ।
मंसिर महिना लागिसकेको र अव चिसो मौसम आएकोले आश्रममा रहनु भएका ज्येष्ठ आमा बुबाहरुलाई न्यानो कपडा सहित केही फलफलूल समेत वितरण गरिएको समाजका अध्यक्ष अमृत बिष्टले जानकारी दिनुभयो ।
दमकमा जेष्ठ नागरिकहरुको स्वास्थ्य र अन्य परोपकारी क्षेत्रमा आफ्नो गतिविधि गर्दै आएकोमा यो पटक देउसी भैलोबाट संकलन भएको दक्षिणाले यहाँ न्यानो कपडा वितरण गर्नुकासाथै आँखा एवं दाँतको स्वास्थ्य शिविर समेत गरिएको बिष्टले बताउनु भएको छ ।
दक्षिणाबाट संकलित ३१ हजार रुपैँयामध्ये त्यसको आधा रकमबाट त्यहाँ सहयोग गरिएको र बाँकी रकम भने संस्थाकै कोषमा राखिएको पनि उहाँले जानकारी दिनुभयो ।
