दमक, मंसिर ४
यदि तपाईंलाई हाइड्रोसिलको समस्या भएर एकदमै अप्ठेरो अवस्थामा घरभित्रै बस्न बाध्य हुनुभएको छ भनें अब झापा अन्तर्गत दमक नगरको अस्पताल र भद्रपुर प्रादेशिक अस्पतालमा सम्पर्क राख्नु होला । त्यहाँ तपाईंको हाइड्रोसिलको निःशुल्क उपचारको कार्यक्रम आएको छ ।
कोशी प्रदेश सरकारको आर्थिक व्यवस्थापनमा त्यसखाले कार्यक्रम आएको हो । जिल्ला स्वास्थ्य कार्यालय झापाले मंगलबार दमक अस्पतालसँग सम्झौता गर्दै हात्तीपाइले रोग निवारण कार्यक्रम अन्तर्गत मंसिर ५ गतेबाट दमकमा हाइड्रोसिलको निःशुल्क उपचार थालिने जानकारी दिएको हो ।
कार्यक्रममा, जिल्ला स्वास्थ्य कार्यालय झापाका जनस्वास्थ्य प्रशासक रमेश बाह्रकोटीले मुख्य रुपमा हात्तीपाइलेका कारण पुरुषहरुको अण्डकोष सुन्निने समस्या अर्थात ‘हाइड्रोसिल’को उपचारमा प्रदेश सरकारको कार्यक्रम रहेको जनाउनु भयो । उहाँले प्रदेश सरकारले जिल्लाका लागि चालु आर्थिक वर्षमा १५ लाख रुपैयाँ बजेट छुट्याएकाले त्यसबाट भद्रपुरमा १ सय र दमक अस्पतालमा १०५ गरी २०५ जनाको अप्रेशन गरिने जानकारी गराउनु भयो ।
झापामा विगत १३ वर्षदेखि लगातार हात्तीपाइले विरुद्धको औषधी सेवनको कार्यक्रम सञ्चालन हुँदै आएको छ । जसमा गत आर्थिक वर्षमा ८४ प्रतिशतले औषधी सेवन गरेर हात्तीपाइलेको संक्रमणमा कमी भएको भएपनि त्यसअघि नै भएको हाइड्रोसिल र हातखुट्टा सुन्निने समस्यालाई पनि राहत प्रदान गर्न यसखाले कार्यक्रम ल्याइएको छ ।
कार्यक्रममा बोल्दै दमक अस्पतालका मेडिकल सुपरिटेन्डेन्ट कृष्णप्रसाद शाहले अघिल्लो वर्ष छोटो अवधिबाट यो कार्यक्रम सुरु भएपनि यो वर्ष भनें केही काम गर्न भ्याइने समयमा सम्झौता भएको उल्लेख गर्नुभयो । उहाँले लुकेर रहेका हाइड्रोसिलका विरामीको पनि खोजतलास गर्नु आवश्यक रहेको औंल्याउँदै त्यसखाले विरामीले तत्काल अप्रेशनसहितको सेवा लिन आव्हान समेत गर्नुभयो ।
सो कार्यक्रम अन्तर्गत प्रति विरामी अप्रेशन खर्च ७ हजारका दरले रकम छुट्याइएको छ । गत वर्ष दमक अस्पतालमा हाइड्रोसिलको समस्या भएका ३० जनाको निःशुल्क अप्रेशन गरिएको थियो ।
झापामा हालसम्म २ हजार २ सय ३ जनामा हात्तीपाइले देखिएकोमा त्यसमध्ये १ हजार ३ सय ५६ जनामा हाइड्रोसिल र ८ सय ४७ जनामा खुट्टा र हात सुन्निने समस्या रहेको जिल्ला स्वास्थ्य कार्यालयका सूचना अधिकारी विश्वनाथ श्रेष्ठले कार्यक्रममा आफ्नो प्रस्तुतिका क्रममा उल्लेख गर्नुभयो ।
जिल्लामा सबैभन्दा बढी गौरीगञ्ज गाउँपालिकामा ३०२ जनामा हात्तीपाइलेको संक्रमण फेला परेको र त्यसमध्ये १७९ जनामा हाइड्रोसिलको समस्या देखिएको छ । दमकमा १३७ जनामा हात्तीपाइले देखिएमध्ये ८७ जनामा हाइड्रोसिलको समस्या फेला परेको तथ्यांक उल्लेख गर्नुभयो ।
८० प्रतिशत हाइड्रोसिल हात्तीपाइलेका कारण हुने भएको उल्लेख गर्दै हात्तीपाइलेका विरामीका लागि दमक र भद्रपुर अस्पतालमा उपचार तथा सहायता स्याहार केन्द्र स्थापना गरी हरेक दिन निःशुल्क उपचार, स्याहारसुसार र परामर्श समेत भइरहेको उहाँले जनाउनु भयो ।
हाल नेपालमा हात्तीपाइले रोगको ६४ जिल्लामा संक्रमण देखिएको छ । सन् २०३० सम्ममा हात्तीपाइले रोग देखिएका विश्वका ७२ देशलाई हात्तीपाइलेको संक्रमणबाट मूक्त गर्ने लक्ष्य राखिएको छ ।
