दमक, मंसिर ७
प्रधानमन्त्री एवम् नेकपा एमालेका अध्यक्ष केपी शर्मा ओलीले ठगी र भ्रष्टाचारगर्नेहरुले चलखेल गर्न नपाएको निहुँमा आफ्नो नेतृत्वको सरकार विरुद्ध अनर्गल प्रचार गरेको टिप्पणी गर्नुभएको छ ।
नेकपा एमाले काठमाडौं, ललितपुर र भक्तपुर जिल्ला कमिटीले शुक्रबार काठमाडौंमा आयोजना गरेको जनजागरण कार्यक्रममा बोल्दै ओलीले त्यस्तो टिप्पणी गर्नुभएको हो । पार्टीविरुद्ध अनेक हल्ला चलाइए पनि एमाले हल्ला र भ्रमको पछि नदौडिने पार्टी भएको र सहकारी ठगी गर्नेहरुले नै उल्टै सरकारलाई गाली गरेको भन्दै कडा टिप्पणी गर्नुभयो ।
उहाँले राष्ट्रिय स्वतन्त्र पार्टीका सभापति रवि लामिछाने सहकारी ठगीमा पक्राउ परेपछि एमाले र आफूमाथि गालीगलौच गरेर राजनीतिक प्रतिशोध साँधेको भन्नु गलत भएको उल्लेख गर्नुभयो । ‘आफैँ सरकारी ठगी गर्ने अरूलाई मुख छाड्ने, अनि अरूलाई गाली गर्ने, कुनै पनि प्रकारको ठगी सह्य हुने छैन’, उहाँले भन्नु भयो ।
कानुनविपरीत अपराध गर्ने जो कोहीलाई अहिलेको सरकारले नछाड्ने ओलीले दाबी गर्नुभयो । साथै उहाँले कता कता पैसा लगानी गरेको छ भनेर आफूमाथि औँला ठड्याउनेलाई बहसमा आउन चुनौती समेत दिनु भयो ।
अलोकतान्त्रिक बाटोबाट अराजकता सिर्जना गरेर समाजलाई भाँड्दै सार्वभौम जनताको भविष्यलाई संकटमा पर्ने प्रयास गरिएको बताउँदै त्यो सपना कहिल्यै पुरा नहुने जिरह गर्नुभयो ।
देश र जनता प्रमुख कुरा भएकाले देश, जनता, विकास र सुशासनका पक्षमा एमाले दृढ रहेको ओलीले बताउनु भयो ।
नेपाली जनता आफ्नो गौरव कायम गर्दै समृद्ध नेपाल सुखी नेपालीको सङ्कल्पलाई पूरा गर्न अघि बढ्ने ओलीको धारणा थियो ।
२०८४ सालको निर्वाचनसम्म अहिलेको सत्ता समीकरण कायम रहने समेत ओलीले उल्लेख गर्नुभयो ।
