दमक, मंसिर १३
दमकको बजार क्षेत्र सफा र सुन्दर बनाउने अभियान चलिरहेको छ । यहि क्रममा दमक नगरपालिकाको वातावरण समितिले नकुहिने फोहोर संकलन गर्ने सामग्री वितरण गर्न थालेको छ ।
यसक्रममा दमक ६ स्थित महावीर टोलमा रहेका ६० घर तथा पसहरुलाई कडाईका साथ नकुहिने फोहोर अलग्गै राख्न बाल्टि वितरण गरिएको छ । नकुहिने फोहोर अलग्गै राख्न तथा वातावरण संरक्षण गर्ने अभियानमा जोडिन आवश्यक सामग्री प्रदान गरिएको दमक ६ का वडाध्यक्ष तथा वातावरण समिति अध्यक्ष टेक बहादुर थापाले जानकारी दिनु भयो ।
बुधबार टोलका केही प्रतिनिधिलाई भेला पारी प्रतिनिधिमुलक ढंगले ती सामाग्री वितरण गरिएको थियो । कुहिने फोहोर हाल्ने भाडो पाएपछि स्थानीयबासीले अव घरबाहिर नकुहिने कुनैपनि फोहोर नफाल्ने र यसलाई कडाईका साथ लागु गर्ने तथा गराउने प्रतिवद्धता व्यक्त गर्नु भयो ।
नगरपालिका कार्यालयले ट्याक्टरमार्फत संकलन हुने कुहिने र नकुहिने फोहोरलाई अगल अलग रुपमा राख्न नगरवासीलाई अनुरोध गर्दै आएको छ । कुहिने फोहोरलाई चाँहि प्राङ्गारिक मल बनाएर करेशाखेतीमा प्रयोग गरिने छ । संकलित फोहोरलाई दमकमा रहेको नेक्सट इरा इनर्जी प्रालिले संकलन र प्रशोधनको जिम्मा लिएको छ ।
