दमक, मंसिर १४
हिउदे बाली लगाउने बेला भएको छ । तर किसानको बारीमा अझै सम्मपनि रासाइनिक मल पुग्न सकेको छैन । रासायनिक मल किन्न भनेर सरकारले चालु आर्थिक वर्षमा २७ अर्ब ९५ करोड बजेट छुट्याएको छ ।
कृषि बाली उत्पादनमा मुख्य भूमिका खेल्ने रासायनिक मल किन्न विनियोजित रकम कृषि बजेटको झन्डै ५० प्रतिशत हो । गत वर्ष पनि मल किन्न ३० अर्ब रुपैयाँ छुट्याइएको थियो । यतिका रकम विनियोजन गरिरहे पनि बर्सेनि मल अभाव भइरहन्छ । किन यस्तो हुन्छ ? किसानले किन समयमै मल पाउँदैनन ।
कृषि सामग्री र साल्ट ट्रेडिङ कम्पनीको गोदाम रित्तै भएको पनि होइन । यी दुवै कम्पनीको गोदाममा पर्याप्त मल छ । साल्ट ट्रेडिङसँग डीएपी करिब १७ हजार टन, युरिया करिब ६० हजार टन छ । साल्टसँग डीएपी १० हजार ७ सय ६५ टन, युरिया ११ हजार ९ सय ८० टन र पोटास ५ हजार ६ सय टन छ । तर तराई क्षेत्रमा गहुँ बालीका लागि डीएपी अभाव छ ।
वर्षमा तीन बाली लगाउँदा वार्षिक करिब १२ लाख टन आवश्यक पर्ने कृषि मन्त्रालयले जनाएको छ । धान बालीका लागि ४ लाख ४८ हजार ६७ टन, मकैका लागि ३ लाख ११ हजार ६ सय ८६ टन र गहुँका लागि १ लाख ५५ हजार ७ सय ३६ टन मल चाहिन्छ ।धानबालीमा लगाउन मल पुगे पनि गहुँ बालीका लागि हाहाकार भएको किसान बताउँछन ।
