दमक, मंसिर १८
जन्म स्थान ओखल्ढुङ्गा हो भन्ने उहाँलाई याद छ । अनि ओखल्ढुङ्गाबाट उदयपुरको कटारी समेत झरेको उहाँ सम्झनु हुन्छ । तर कोसँग झरेको र कोसँग बसेको केही पत्तो छैन । एकजना फूपु चाहि ओखल्ढुङ्गामै बस्नु हुन्छ भन्ने पनि उहाँ भन्नु हुन्छ तर फूपुको नाम पनि उहाँलाई थाह छैन । यसरी आफ्नो परिवार, घर र कोहि पनि आफन्त बेगरनै उहाँको जिन्दगी बितिरहेको छ । कहाँ कस्ले के काम दिन्छ त्यो काम गर्ने र बस्ने गर्नु हुन्थ्यो । तर अली बढि मादक पर्दाथ सेवन गर्ने भएपछि कामबाट निकालीनु हुन्थ्यो । त्यसपछि उहाँको जाने फेरि कुनै ठाउँ हुदैन थियो । सडकको किनार र त्यहि सडकमा हिडनेहरुले दिएभने खाने उहाँको दैनिकी बन्थ्यो ।
यहि क्रममा उहाँ बिभिन्न ठाउँ हुदै दमक आईपुग्नु भयो । दमकको बसपाकर्मा पानी बेच्दै गुजारा चलाईरको बताउनु हुने उहाँ सडक दुर्घटनामा पर्नु भयो । र अहिले ३ महिना सम्म बेड रेष्ट गर्नुपर्ने गरी थलिनु भएको छ ।
उहाँको नाम हो कुमार आले मगर । उमेरले २ कोरी हाराहारी पुग्नु भएका आले अहिले सम्मपनि कुमारनै हुनुहुन्छ । अर्थात विवाह गर्नु भएको छैन । होटलमा काम गर्ने , त्याँबाट निकालिदा बसपार्कहरुका पानी बेच्ने गर्दा गर्दै दमक आइपुग्नु भएको हो । दमक आएपछि उहाँ आफुजस्तै साथीसग रतुवाको पुल तिरजाँदौ गर्दा ट्याक्टरको ठक्करका कारण दुर्घटनामा पर्नु भयो । दुवैजना मदिराले लठ्ीएर हिडेका बेला ट्याक्टरले दुर्घटना गराउँदा उहाँको टाउको, खुट्टा तथा शरिरका अन्य भागमा गहिरो चोट लागेको छ । दुर्घटना रातको समयमा भएको भएपनि उहाँ भोलीपल्ट बिहान १० बजे मात्रै कसैको सहयोगमा दमक अस्पताल आइपुग्नु भएको थियो ।
शरीरभरी चोट । रगतका टाटा लागेको कपडा । दुङ्गदुङी गन्हाउने शरीर भएको थियो । अस्पताल ल्याउँदा ड्रेसिङ रुममा कसरी छिराउने होला भन्ने स्थितीबाट सडकबाट उद्धार गरी अस्पताल सम्म ल्याइएको उद्धारमा खटिनु भएका प्रहरी जावन आत्मराम खड्काले बताउनु भयो ।
यसरी अस्पताल आइपुग्नु भएका आलेको स्वास्थ्यमा केहि सुधार भएको छ । तर कम्तिमा २ महिना सम्म बेड रेष्ट गर्न चिकित्सकको सुझाव छ । उहाँको सबै उपचार खर्च अस्पतालको तर्फबाट निशुल्क रुपमा भएको र उपचारमा खटिनु भएका डा. समशेर यादव भन्नु हुन्छ ‘उहाँको मेरुदण्डमा समस्या भएको छ । निकै ठुलो दखल छ । २ महिना औषधी सेवन गर्दै आराम गरेपछि थप उपचार गर्न आवश्यक छ ।
अहिले आलेलाई अस्पतालबाट डिस्चार्ज गरिएको छ । डिस्चार्जपछि दमक २ मा रहेको मानव उद्धार सेवामा पठाइएको छ । यसरी बेवारिसे भएकाहरुको सहारा बनेर दमकमा स्थापना भएको मानव उद्धार सेवामा आले सहित २४ जना बेवारिसेहरुलाई राखिएको छ ।
