दमक, मंसिर २५
विगत ३४ वर्षदेखि नेपालका शिविरमा शरणागत जीवन विताउँदै आएका भूटानी नागरिकहरुले आफूहरुकोे स्वदेश फर्किने अधिकारलाई पूरा गराउन सम्बन्धित निकायसँग माग दोहोर्याएका छन् ।
उनीहरुले मंगलबार अन्तर्राष्ट्रिय मानव अधिकार दिवसका अवसरमा झापाकोे दमकस्थित बेलडाँगी शिविरमा र्याली निकाली आफूहरुको स्वदेश फर्किने व्यग्र चाहनालाई मावन अधिकारका रुपमा पूरा गराउन माग अघि सारेका हुन् ।
भूटान स्वतन्त्र जनमञ्च र राष्ट्रिय मेलमिलाप समितिले संयुक्त रुपमा आयोजना गरेको स्वदेशफिर्तीका लागि ध्यानाकर्षण कार्यक्रम अन्तर्गत ज्येष्ठ नागरिकहरुको समेत उल्लेख्य सहभागिता रहेको थियो ।
शरणार्थीका संख्यामा होइन, समस्यामा ध्यान देउ, हाम्रो देश प्राणभन्दा प्यारो छ, दर्ता गर्न छुटेका शरणार्थीको अबिलम्ब दर्ता गर जस्ता नारा लेखिएका प्लेकार्ड बोकेर र्यालीले शिविर परिक्रमा गरेको थियो । कतिपय भूटानको राष्ट्यि पोशाकमा समेत उपस्थित भएका थिए ।
कार्यक्रममा भूटान पिपुल्स पार्टीका अध्यक्ष बलराम पौडेलले शरणार्र्थीको स्वदेश फर्किन पाउने मानव अधिकार पूरा गराउन सम्बन्धित निकायको ध्यानाकर्षण गराउनु भयोे ।
कार्यक्रममा नेपाल मानव अधिकार संगठनका केन्द्रीय नेता केपी सुवेदीले पनि भूटानीहरुको स्वदेश फर्किने अधिकार सुनिश्चित हुनुपर्नेमा जोड दिनु भयो । कार्यक्रममा बेलडाँगी शिविर सचिव सञ्चहाङ सुब्बासहितले स्वदेशफिर्तीका पक्षमा मन्तव्य राख्नु भएको कार्यक्रममा सहभागि दिल भूटानीले जनाउनु भयो । उता, मोेरङको पथरी शनिश्चरे शिविरमा पनि कार्यक्रम गरिएको छ ।
स्वदेश फर्किने दर्विलो पहल हुन नसक्दा शिविरमा रहेका १ लाख १३ हजार ५ सयको संख्याका भूटानीहरुलाई अमेरिकासहितका ८ वटा देशमा पुनर्वास गराइएको छ । स्वतन्त्रता र मानवअधिकारको आवाज उठाउँदा भूटान सरकारबाट लखेटिएकामध्ये ७ हजारको हाराहारीमा बेलडाँगी र पथरी शनिश्चरे शिविरमा बसिरहेका छन् । दातृ संस्थाहरुबाट हुँदै आएको राहत सहयोग पनि बन्द भएपछि उनीहरु अप्ठ्यारोमा जीवन विताउन वाध्य छन् ।
भिडियो र तस्वीर ः दिल भूटानी
