दमक, पुस ९
कोशी प्रदेशका मुख्यमन्त्री हिक्मतकुमार कार्कीले आउँदो आर्थिक वर्षबाट प्रदेशभर लागुऔषध दुव्र्यसन नियन्त्रणमा अभियान नै सञ्चालन गरिने बताउनु भएको छ ।
मुख्यमन्त्री कार्कीले आज झापाको दमक नगरपालिकाले थालेको ‘लागुऔषधको नियन्त्रण, रोकथाम, सचेतना र उपचारको दोस्रो चरणको अभियान’को शुभारम्भ गर्दै सो कुरा बताउनु भएको हो ।
उहाँले आफ्नो अघिल्लो कार्यकालमा ‘म अघि बढ्छु’ भन्ने भावनात्मक नारामा युवाहरुलाई ‘सगरमाथा टिन्स क्लब’ नामाकरण गरिएको समूहमा समेटेर कार्यक्रम थालिएको प्रसंग ल्याउन भयो । सरकार फेरिँदा कार्यक्रम काटिएको र अब त्यसलाई निरन्तर प्रदेशका विद्यालय विद्यालयमा अभियानका रुपमा सुचालु गरिने उल्लेख गर्नुभयो । टोल टोल र वडा वडाबाट गरिएका प्रयासले लागुऔषध नियन्त्रण प्रभावकारी हुने भन्दै नगरपालिकाले थालेको अभियानको प्रसंशा गर्नुमात्र होइन अभियानमा प्रदेशले सबै हिसाबले सघाउने वचनवद्धता व्यक्त गर्नुभयो ।
मुख्यमन्त्री कार्कीले आफ्नो आफ्नो क्षेत्रबाट यसको नियन्त्रणमा लाग्नुपर्ने र भारतीय सीमा क्षेत्रबाट नै लागुऔषध भित्रिन रोक्नु अझ महत्वपूर्ण पक्ष रहने उल्लेख गर्दै भारतीय अधिकारीसँग यसबारेमा गहन छलफल आवश्यक रहेको समेत औंल्याउनु भयो ।
कार्यक्रममा पूर्व संघीय सांसद महेन्द्रकुमारी लिम्बुले घरका अभिभावकहरुले आफ्ना छोराछोरीको बढी ख्याल राखेर दुव्र्यसन हुनबाट जोगाउनु पर्ने कुरामा जोड दिनु भयो । सो सन्दर्भमा बोल्दै माओवादी केन्द्रका गगन पुरीले रोजगारमूलक र आत्मनिर्भर बनाउने शिक्षा नीति नहुँदा पनि लागुऔषध दुव्र्यसनमा युवापुस्ता फस्दै गएको तर्क राख्नु भयो ।
कार्यक्रमका सभाध्यक्ष एवम् अभियानका संयोजक दमक नगर प्रमुख रामकुमार थापाले प्रहरी साझेदारी समितिसहित नगर, वडावडा तथा विद्यालयहरुमा समिति बनाएर वार्षिक कार्ययोजनाकासाथ लागुऔषध नियन्त्रण अभियानलाई मूर्त रुप दिने कोशिस भइरहेको जनाउनु भयो ।
कार्यक्रममा दमक नगरको सामाजिक विकास समिति संयोजक सारदा भट्टराई र नेपाली कांग्रेसका शेरबहादुर भट्टराईले आफ्ना छोराछोरीलाई मनोवैज्ञानिक तरिकाले सुधार्नु आवश्यक रहेको धारणा राख्नु भयो ।
कार्यक्रममा नगर उपप्रमुख रेगिना भट्टराई प्रसाईंले सभ्य समाज निर्माण गर्न सबैको सहकार्य आवश्यक रहेको जनाउँदै नगरपालिकाले आर्थिक विपन्न अवस्थाका ३० जना लागुऔषध प्रयोगकर्तालाई सुधार गरी पुनस्र्थापना गराएको प्रसंग उल्लेख गर्नुभयो ।
कार्यक्रममा, दमक नगरका प्रमुख प्रशासकीय अधिकृत गणेशराज कार्कीले २०८० पुसबाट थालिएको पहिलो चरणको अभियान अन्तर्गत भएका गतिविधिका बारेमा समीक्षात्मक जानकारी प्रस्तुत गर्नुभयो । यो अवधिमा दुव्र्यसनमुक्त भई अरुलाई पनि मुक्त बनाउने अभियानमा लाग्नु भएका दमक ७ का पशुपति फागो र ७ नम्बरकै संयुक्त टोल विकास समितिलाई पुरस्कृत गरिएको छ । अभियानमा दमक नगरबाट १० लाख र प्रदेश सरकारबाट ५ लाख रकम विनियोजन भएको थियो ।
