काठमाडौ, पुस १५
सर्वोच्च अदालतको आदेशले हिरासतमुक्त भए पनि मेडिकल व्यवसायी दुर्गा प्रसाईंलाई प्रहरीको केन्द्रीय अनुसन्धान ब्युरो (सीआईबी) ले दैनिक तारेखमा राखेको छ। आपराधिक लाभसम्बन्धी कसुर र संगठित अपराधको कसुरमा अनुसन्धान भइरहेकाले उनले दिनदिनै सीआईबीमा हाजिर हुनुपर्ने सीआईबीका प्रवक्ता होबिन्द्र बोगटीले बताउनु भयो ।
अनुसन्धान चलिरहँदा उहाँले आफ्नो आवाज परीक्षण गर्न भने इन्कार गर्नुभएको छ । प्रसाईले व्यवसायीलाई धम्क्याएका र उहाँ मार्फत परिचालित हरिचन्द्र फुयालसँगका ५ वटा अडिओ संवाद प्रहरीले फेला पारेको छ। उक्त अडिओ प्रसाईंकै हो कि होइन भनेर परीक्षण गर्न खोज्दा प्रसाईंले इन्कार गरिरहनु भएको सिआइविले जनाएको छ ।
उहाँले बयानका क्रममा भने आफ्नो नभएको बताउने गर्नु भएको छ । पाँचथर घर भई झापाको मेचीनगर–१३, चारआली बस्ने २६ वर्षीय फुयाललाई सुरुमा पक्राउ गरेपछि उहाँकै मोबाइल परीक्षण र उहाँको बयानका क्रममा प्रसाईंको संलग्नता खुलेको थियो। अहिले प्रहरीले प्रसाईले सञ्चारमाध्यममा दिएका अन्तर्वार्ताका अडिओसँग भिडाएर परीक्षण गरिरहेको छ।
