दमक, पुस १९
अहिले पनि व्यवसायमा मन्दी नै छ । व्यवसाय चलायमान भएको अवस्थामा पनि कुन व्यवसाय के कसरी चल्ला भन्ने अनुमान गर्न गाह्रो पर्छ ।
विभिन्न व्यवसाय गरेर हैरान बनेका व्यवसायीमध्येमा पर्नुहुन्छ दमक ६ की गीता लिम्बू । उहाँले कस्मेटिक, कोल्ड सेन्टर, किराना पसल गरेर पनि आर्थिक हिसाबले व्यवसायिक प्रवद्र्धन हुन सकेन । त्यसपछि उहाँले सबै समय चल्ने व्यवसाय के हुनसक्ला भन्ने सोच्दा उहाँका लागि व्यूटिपार्लर व्यवसाय उपयुक्त होला भन्ने लाग्यो र पार्लर सिकेर व्यवसाय थालेपछि भनें खासै व्यवसायिक चिन्ता हुन छाडेको छ । अर्थात उहाँले दमक ६ स्थित नयाँ सब्जीबजारको आइओएम कार्यालय उत्तरमा अहिले २ वटा पार्लर सञ्चालन गरेर आफूलाई त्यसैमा समर्पित गराउनु भएको छ ।
विगत ४ वर्षदेखि ग्लोरी व्यूटिपार्लर एण्ड ट्रेनिङ सेन्टर सञ्चालनमा ल्याउनु भएकी गीताले त्यही भवनसँगै जोडिएको अगाडिपट्टि रहेको ठाउँमा २०८१ को मंसिर १९ बाट द व्यूटी वर्ल्ड नामक पार्लर समेत जोडेर सञ्चालनमा ल्याएपछि सो क्षेत्र पार्लरको रमितलाग्दो स्थल बन्न पुगेको छ । आफूले यसअघि दमक र काठमाडौंमा पार्लर सिकेको सुनाउँदै उहाँले अरुको पार्लरमा समेत काम गरेर ११ वर्षको अनुभव अनि सीटीइभीटीबाट लेभल २ को तालिम सकेपछि आफू आफ्नै पसल सञ्चालनमा दर्बिलो रुपमा अघि बढेको बेलिबिस्तार लगाउनु भयो ।
अहिले उहाँकोमा पार्लर सिक्नेहरुको भीडभाड छ । त्यहाँ पार्लर सिकेर विदेश जान चाहनेहरु पनि उत्तिकै छन् । त्यहाँ सिकेर विदेशमा अरु रोजगार भएको बुझेर आफु पार्लर सिक्न आएको प्रशिक्षार्थीहरु सरु घिमिरे र दीपा गौतमको प्रतिक्रिया छ ।
नेपालको र विदेशको साजसज्जाको तरिकामा फरक पर्छ । त्यस हिसावले कुवेतमा पार्लरको काम गरेर त्यताको तरिका सिकाउनका लागि दमक २ की सिर्जना भट्टराई सो पार्लरमा प्रशिक्षकका रुपमा रहनु भएपछि त्यहाँ विदेश जाने इच्छामा पार्लर सिक्न आउनेहरुलाई सजिलो भएको छ ।
विदेश जान इच्छुकहरुको सिकाईको रोजाईकोथलो बन्दै आएका ती पार्लरमा अझ छुटको व्यवस्था भएको प्रचार प्रसारले पनि टाढा टाढादेखि त्यहाँ सिक्न आउने गरेका छन् । छुटका साथै वर्षमा एक पटक १० दिनको फ्रि कोर्ष अनि वर्षमा आर्थिक विपन्न १० जनालाई निःशुल्क सिकाउने योजनाले पनि सिक्नेहरुलाई राहत पुगेको पार्लरकी प्रोप्राइटर गीता लिम्बूको भनाई छ ।
हाल जम्मा ७ वटा भाडाका सटरमा पार्लर सञ्चालन भइरहेको छ । ३ देखि ६ महिनासम्मको डिप्लोमा कोर्षकालागि गीताले प्रशिक्षकसहितका ५ जना सहयोगी राख्नु भएको छ । द व्यूटी वर्ल्डमा १३ लाख र ग्लोरीमा समेत गरी ३५ लाख हाराहारीको लगानी गरेर त्यसैबाट आर्थिक भविष्य व्यवस्थापनमा गीताको दिनचर्चा चलिरहेको छ ।
