दमक, पुस १९
दमक नगरपालिकाको ५ नम्बर वडा कार्यालयको सहयोग र समन्वयमा वडा बाल सञ्जाल दमक ५ ले शुक्रबार पर्यावरणमैत्री हस्तकला एवम् कविता प्रतियोगिता सम्पन्न गरेको छ ।
स्थानीय दीपिनी आधारभूत विद्यालयमा आयोजित कार्यक्रम अन्तर्गत कविता प्रतियोगितातर्फ सरस्वती माविका कक्षा ९ का बसन्त चापागाईं प्रथम, सूर्योदय बोर्डिङका इशान केरुङ द्वितीय, कर्नरस्टोन फाउण्डेशनकी संस्कृति थापा तृतीय र झापा मोडल स्कुलका स्मिथ पराजुलीले सान्त्वना स्थान हाँसिल गरी पुरस्कृत बन्नु भयो ।
हस्तकलातर्फ, प्रजिता एजुकेशनल एकाडेमीका शिखा राई र पविना योङहाङ प्रथम, सूर्यादय सेकेन्डरी स्कुलकी सुरुची चौधरी र अस्मिता चौधरी द्वितीय, कर्नरस्टोन फाउण्डेशनका सादोक लिम्बू र सृष्टि आङथुपो तृतीय तथा लालिगुराँस इङ्गलिस बोर्डिङ स्कुलका पिन्स लिम्बू र लिजा लिम्बूले सान्त्वन स्थान प्राप्त गर्नुभयो । ५ नम्बर वडाध्यक्ष इन्द्रबहादुर गुरुङको प्रमुख आतिथ्यता रहेको कार्यक्रममा नगरका १७ वटा विद्यालयको सहभागिता रहेको थियो ।
नगरको पहिलो बालमैत्री वडाका रुपमा रहेको ५ नम्बर वडामा बालबालिकाको क्षमता अभिबृद्धिका कार्यक्रमहरु सञ्चालन गर्न वडा कार्यालय लागिपरेको वडा सदस्य खड्गबहादुर राईले जनाउनु भयो ।
नगर बाल सञ्जाल तथा ५ नम्बर वडा बाल सञ्जालका अध्यक्ष प्रिवेश श्रेष्ठले भर्खरै घोषणा भएको ५ नम्बर वडा बालमैत्रीपूर्ण अवस्थालाई निरन्तरता दिन कार्यक्रम आयोजना गरिएको धारणा राख्नुभयो ।
कार्यक्रमका सन्दर्भमा नगर बाल सञ्जालकी पूर्व अध्यक्ष आकृति बस्नेतले अब बालबालिकाको हकहित सहितका सृजनात्मक गतिविधि गरेर समग्र दमकलाई नै बालमैत्री नगर घोषणा गराउन लागिपरेको बताउनु भयो ।
