काठमाडौ, पुष २३
एकै दिन सुरु भएको नेकपा एमाले र माओवादी केन्द्रको केन्द्रीय कमिटीको बैठक आज सकिदै छ ।
एमालेको ललितपुरमा जारी केन्द्रीय कमिटी बैठकमा प्रस्तुत राजनीतिक एवं साङ्गठनिक प्रतिवेदनमाथि केन्द्रीय सदस्यहरूले धारणा व्यक्त गर्ने क्रम आज पनि जारी रहने भएको छ ।
बैठक बिहान ११ बजेबाट सुरु हुने बताइएको छ । आइतबार सुरु भएको बैठकमा अध्यक्ष केपी शर्मा ओलीले राजनीतिक प्रतिवेदन र महासचिव शङ्कर पोखरेलले साङ्गठनिक प्रतिवेदन प्रस्तुत गर्नु भएको थियो । सोहि प्रतिवेदनमा केन्द्रिय सदस्यहरुले धारणा राख्ने क्रम जारी रहेकोछ । सो धारणाको आज पार्टि अध्यक्ष तथा प्रधानमन्त्री केपि शर्मा ओलीले जवाफ समेत दिने र बैठक समापन गर्ने तयारी रहेको एमाले श्रोतले जनाएको छ ।
यस्तै माओवादी केन्द्रको केन्द्रीय समिति बैठक आज पनि जारी रहने भएको छ । आइतबारदेखिनै काठमाडौमा जारी बैठकको आज तेस्रो दिन पनि नेताहरूले अध्यक्ष पुष्पकमल दाहाल प्रचण्डको राजनीतिक प्रतिवेदनमाथि आ आफ्नो धारणा राख्नेछन् ।
दोस्रो दिन सोमबार ८० जनाले आ–आफ्नो धारणा राखेका थिए । बोल्नका लागि कुल १८० जनाले नाम टिपाएको माओवादीले जनाएको छ । आइतबारको बैठकमा प्रचण्डले आफ्नो राजनीतिक प्रस्ताव पेस गरेका थिए ।
नाम टिपाएकाहरुले बोल्ने क्रम सकिएपछि बैठक समापन गर्ने माओवादी केन्द्रको तयारी रहेको छ । अझै एकसय जनाको बोल्ने क्रम बाँकीनै रहेकोले बैठक भोली सम्म लम्बीने जनाइएको छ ।
