काठमाडौ, पुस २६
भौतिक पूर्वाधार तथा यातायातमन्त्री देवेन्द्र दाहालले पूर्व–पश्चिम राजमार्गअन्तर्गत पूर्वी नवलपरासीको दुम्कीबासमा पुल भाँचिँदा सवारी आवागमन बन्द भएपछि बढी भार भएका सवारीसाधनको जाँच कडा बनाउन निर्देशन दिनु भएको छ ।
साथै उहाँले दुम्कीबासको यातायात तुरुन्तै सञ्चालनमा ल्याउन सडक विभागलाई कडा निर्देशन समेत दिनु भएको छ।
शुक्रबार साँझ दुम्कीबासमा पुल भाँचिएका कारण अवरुद्ध हुन पुगेको यातायात लाई डाइभर्सन निर्माण गरी अविलम्ब सञ्चालनमा उहाँको निर्देशन भएको हो ।
उक्त स्थानमा अस्थायी व्यवस्था गरेर भए पनि सडक खुलाउन मन्त्री दाहालले निर्देशन दिनु भएको हो ।
मन्त्री दहालले प्रहरी तथा अन्य निकायहरूसँग समेत समन्वय गरी सवारीसाधन रोकिने अवस्था आउन नदिन विभागलाई निर्देशन दिनु भएको उहाँको सचिवालयले जनाएको छ ।
