दमक, माघ १
दक्षिणी इलाममा रहेर रंगमञ्च गतिविधिमा सक्रिय चुलाचुली रंगमञ्चले विद्यालयका विद्यार्थीहरुको प्रस्तुतिमा माघ १४ र १५ गते ‘तेस्रो चुलाचुली पाठशाला नाट्य महोत्सव’ आयोजना गर्ने भएको छ ।
चुलाचुली–३ स्थित शिव ओरक मिलन पोखरी पर्यटन क्षेत्रमा हुने महोत्सवका लागि मञ्च र दर्शक दीर्घा लगायतका संरचना निर्माणमा स्थानीय रंगकर्मीहरु जुटिरहेको संस्थाका निर्देशक चेतन आङथुपो ‘डर’ ले जनाउनु भयो । त्यहाँ निर्मित खुला रंगमञ्चमा बिहान १० देखि अपरा्हन ४ बजेसम्म नाटकहरु प्रदर्शन गरिने आङ्थुपोले बताउनु भयो । कार्यशाला पनि आयोजना हुनेछ ।
महोत्सवमा नेपालका सात वटा विद्यालयको प्रस्तुति छनोटमा परेको पनि उहाँले बताउनु भयो । चुलाचुली–२ को अमृत बोर्डिङ स्कुल, सोही स्थानको जनता मावि, चुलाचुली–४ को बालज्योति माध्यमिक विद्यालय, पञ्चबुद्ध एकेडेमी, मोरङ मिक्लाजुङस्थित मधुमल्लाको रिलायन्स बोर्डिङ स्कुल, सुन्दरहरैँचा विराटचोकको सुबिजुमुर मेमोरियल बोर्डिङ स्कुल र हेटौंडाको ज्ञानोदय बालबाटिका आवासीय माध्यमिक विद्यालय महोत्सवका लागि छानिएका छन् ।
यसखाले पहिलो महोत्सवमा ६ वटा र दोस्रो महोत्सवमा १० वटा नाटक मञ्चन गरिएको थियो ।
२०६९ मा स्थापित चुलाचुली रंगमञ्चले नाटक महोत्सव, नाट्य कार्यशाला जस्ता गतिविधि गर्दै आएको छ । खासगरी विद्यार्थीलाई लक्षित गरी संस्थाले नाट्य कार्यशाला र महोत्सवहरू आयोजना गर्दै आएको छ । विद्यार्थीलाई किताबी ज्ञानका साथै सृजनात्मक गतिविधिमार्फत प्रतिभा बाहिर ल्याउने र असल नागरिक बनाउन यसखाले कार्यक्रम मद्धत पुग्ने आयोजकको अपेक्षा छ ।
