दमक, माघ २१
पछिल्लो समय बारिस्ता अर्थात कफि बनाउने तालीम लिन चाहने यूवाहरुको जमात बढिरहेको छ । गल्लि गल्लिमा कफिका क्याफेहरु खुल्ने र विदेशमा समेत कफि बनाउने सीप भएकाहरुले राम्रो अवसर पाउने भएपछि यसको तालीम लिन यूवाहरुको आकर्षण बढ्न थालेको हो ।
यूवा पुस्तामा देखिएको यो आकर्षणलाई ध्यानमा राख्दै दमकको वडा वडामा बारिस्ता सम्बन्धीको तालीमहरु सञ्चालन भइरहेका छन् । वडा कार्यालयहरुले आफ्नो वार्षिक कार्यक्रमनै बनाएर वडामा रहेका यूवाहरुलाई निशुल्क कफि बनाउने तालीम सिकाइ रहेका छन् ।
यही क्रममा दमक नगरपालिका वडा नं १ ले पनि कफि बनाउने तालीमको सुभारम्भ गरेको छ । वडाध्यक्ष हरि न्यौपानेले तालीमको उद्धघाटन गर्दै भन्नु भयो ‘ २० दिन सम्म सञ्चालन हुने यो तालीममा सहभागी भएकाहरुले कफि बनाउन जान्ने भएर आफ्नै ठाउँमा आय आर्जन गर्न सक्ने हुनुपर्छ । क्षमतावान बन्नुस त्यसमा थप सहयोग गर्न वडा फेरि तयार हुने छ । ’
सोमबार वडा कार्यालयमै भएको तालीमको उद्धघाटन कार्यक्रममा वडा सदस्य प्रकाश बुढाथोकीले वडामा रहेका यूवाहरुलाई सीपसग जोडेर आफ्नै ठाउँमा आत्मनिर्भर बनाउने कार्यक्रमहरु सञ्चालन गरिरहेको उल्लेख गर्नुभयो ।
३० जना सहभागी हुने यो तालीम सम्पन्न गर्न वडा कार्यालयले स्मार्ट सिप विकास तालीम केन्द्र दमक ६ संग समन्वय गरेको छ । तालीम केन्द्रका सञ्चालक तथा प्रशिक्षक फडिन्द्र दाहालले कफिको इतिहास सिकाउँदै बिभिन्न प्रकारका कफिहरु बनाउन प्रयोगात्मकरूपमा सिकाउने र दक्ष बनाएर मात्रै बाहिर निकाल्ने प्रतिवद्धता जनाउनु भयो ।
वडा नं १ को वार्षिक बजेट अनुसार २ लाख रुपैँयामा ३० जना यूवाहरुले कफि बनाउने तालीम लिन सुरु गरेका छन । यूवाहरुलाई सीपसङ्ग जोडेर आत्मनिर्भर गराउने वडाको योजना अन्तर्गत यसखाले कार्यक्रम सञ्चालन भएको वडा कार्यालयले जनाएको छ ।
