दमक माघ २९
विगत १६ महिनादेखि हमासको नियन्त्रणमा रहेको ठानिएका कञ्चनपुरका विपिन जोशीको सकुशल रिहाइका लागि नेपाली अधिकारीहरूले पहल गरिरहेको बताए पनि कूटनीतिक क्षेत्रका जानकारहरूले सरकारी पहल प्रभावकारी नभएको टिप्पणी गरेका छन्।
इजरेलबाट प्रकाशित हुने ’जेरुसलेम पोस्ट’ले तान्जानिया, श्रीलङ्का र नेपालजस्ता देशहरूको ’कूटनीतिक पहुँच नपुगेका कारण’ ती देश आफ्ना नागरिक मुक्त गर्न पछि परेको टिप्पणी गरेको छ। इजरेलको सबैभन्दा पुरानो पत्रिकाले गाजामा बन्धक बनाइएका आफ्ना नागरिकहरू पत्ता लगाउन अमेरिकाजस्ता देशहरूले निगरानी गर्ने ड्रोनसहितका स्रोतसाधन इजरेललाई उपलब्ध गराएको सन्दर्भ पनि समाचारमा उल्लेख गरेको छ।इजरेलका लागि नेपाली राजदूत धनप्रसाद पण्डित नेपाले आफ्नो कूटनीतिक सम्बन्ध भएका ठाउँहरूमा विपिन जोशीको रिहाइका लागि पहल गरिरहे पनि विपिनको अवस्था र रिहाइको योजनाबारे कुनै जवाफ नपाएको प्रतिकृया दिनुभएको छ ।
सरकारले आवश्यक सबै प्रयासहरू गरिरहेको छ तर अहिलेसम्म कुनै नयाँ विकासक्रम नभएको उहाँले सुनाउनुभयो । कतारका लागि पूर्वराजदूत रहेका भारद्वाज नेपालले कतारबाट सहयोगको धेरै अपेक्षा गरे पनि उसको कामको दायरा फराकिलो भएका कारण विपिन जोशीको रिहाइ कतारको प्राथमिकतामा नपरेको हुन सक्ने बताउनु भएको छ ।
यता परराष्ट्र मन्त्रालयका प्रवक्ता कृष्णप्रसाद ढकाल नेपालका प्रधानमन्त्री र परराष्ट्रमन्त्रीसमेतले विपिन जोशीको रिहाइका लागि पहल गरिरहेको बताउनु हुन्छ ।विपिन जोशीको सुरक्षा र शीघ्र रिहाइका लागि नेपालले सबै तहबाट निरन्तर कूटनीतिक पहल र प्रयत्न जारी राखेको छ र चाँडै नै रिहाइ हुनेमा विस्वस्त रहेको उहाँको भनाई छ ।
इजरेलका राजदूत पण्डितले पनि आफूले हालै मात्रै इजरेलमा रहेका ब्रिटिश, अमेरिकी र जर्मन राजदूतहरूसँग पनि विपिनको रिहाइका लागि पहल गरिदिन आग्रह गरेको बताउनु भएको छ ।
