दमक, फागुन ४
भारतको नयाँ दिल्ली रेलवे स्टेसनमा शनिबार राति भएको भागदौडमा परी १८ जनाको मृत्यु भएको पुष्टि भएको छ भने कैयौँ घाइते भएका छन् ।
प्रशासनले मृतक १८ जनाको नामावली समेत सार्वजनिक गरेको छ । यसैबीच रेलवेले मृतकका परिवारलाई १० लाख भारतीय रुपैयाँ क्षतिपूर्ति दिने घोषणा गरेको छ ।
गम्भीर घाइतेलाई २ लाख ५० हजार र सामान्य घाइतेलाई १ लाख रुपैयाँ क्षतिपूर्ति दिने घोषणा गरिएको बिबिसि हिन्दिमा उल्लेख छ ।
प्रशासनले यो घटनालाई अत्यधिक भीडभाडका कारण भएको बताएको छ । साथै, वास्तविक कारण पत्ता लगाउन अनुसन्धान गरिने पनि उनीहरुले बताएका छन् ।
घटनाका बेला उपस्थित प्रत्यक्षदर्शीले पनि भागदौडको अनुभव सुनाएका छन् । प्रत्यक्षदर्शीका अनुसार मञ्चमा प्रवेश गर्न प्रयोग गरिने फुटब्रिजमा भागदौड मच्चिएको थियो ।
