दमक, फागुन १४
हिन्दू धर्मावलम्बीहरूले मनाउने महाशिवरात्रि पर्व आज परेको छ । आराध्यदेव भगवान् शिवको पूजाआराधना गरी मनाइने यो पर्व देशभरका शिवालय मन्दिरमा बिहानैबाट भिडभाड छ ।
वैदिक सनातन हिन्दू धर्मावलम्बीहरूले आज बिहानै नदी, कुण्ड र तलाउमा स्नान गरी शिवालयमा गई श्रद्धा भक्तिपूर्वक पूजाआराधना गरेका छन् ।
प्रत्येक वर्ष फागुन कृष्ण चतुर्दशीको मध्यरातमा मनाइने महाशिवरात्रि पर्व भगवान शिवको उत्पत्ति भएको रातका नामबाट नामकरण भएको हो । यो पर्व कालरात्रि, मोहरात्रि, सुखरात्रि र शिवरात्रि नामक चार प्रमुख रात्रिमध्ये एक पवित्र पर्वका रूपमा विभिन्न पुराणहरूमा वर्णित छ । महाशिवरात्रि शिवपार्वतीको विवाह भएको दिनको रुपमा समेत मनाउने गरिन्छ ।
महाशिवरात्रि पर्वको अवसरमा काठमाडौंको पशुपतिनाथ लगायत देशभरका शिवालयमा बिहानैदेखि दर्शनार्थीहरूको भीड लागेको छ ।
यस अवसरमा झापाको दमक ५ स्थित धनेश्वर शिवालय मन्दिर, दमक ६ स्थित पशुपति मन्दिरसहितमा दर्शनार्थीको जमघटकासाथ पूजाआजा गरिएको छ । दिनभर भजनकिर्तन गर्ने कार्यक्रम समेत सञ्चालन गरिएको छ ।
