दमक, फागुन १४
लोकतन्त्रपछिको स्थानीय तहको दोस्रो कार्याकालको निर्वाचन सम्पन्न भएको आधा भन्दा धेरै अवधि सकिएको छ । यस बिचमा जनताका अपेक्षा अनुसारका काम भएनन् र जनप्रतिनिधि पुरानै पारामा काम गरिरहेका छन् भन्ने आरोप लागिनै रहेको छ ।
यस अवस्थामा दमक नगरपालिका वडा नम्बर ८ का जनप्रतिनिधि भने आफुहरुले गरेको अहिलेसम्मको काम कस्तो भयो र अव के गर्दा हुन्छ भन्दै जनताको घर घरमा पुगिरहेका छन् । यहि क्रममा वडाबासीहरुको तथ्यांक रेडर्क पनि लिने काम भएको छ । यसरी चुनावमा भोट माग्न गएकै शैलीमा घर घर पुगेका जनप्रतिनिधिलाई यहाँका नागरिकले यहाँ रहेको दीपिनी खोलामा तटबन्ध निर्माण गरिदिन र गाउँका बिग्रेका सडकहरु बनाइदिन माग गर्नेमा हुनुहुन्छ स्थानीय कमला पौडेल र बिदुर बस्नेत ।
बिहानको खाली समयमा जनप्रतिनिधिहरु फायल बोकेर कर्मचारी सहितको टोली लिएर घर घर पुगेका छन् । यसरी जहाँ पुगिन्छ जनताकै घरमा जे पाक्छ त्यहि खाने गरी दमक ८ का जनप्रतिनिधिहरु यतीबेला घरदैलो अभियानमा छन् । एक महिनासम्म चल्ने यो अभियानमा जनताको नजरमा आफूहरुको कामको मूल्यांकन गराउने र नयाँ योजनाहरु कहाँ के के आवश्यक छन् भनेर तिनको पहिचान गर्दै क्रमागत रुपमा बजेट बिनियोजन गराएर काम गर्ने नयाँ पाठ सिक्न पनि यो अभियान चलाइएको वडाध्यक्ष धर्मप्रसाद दाहाल ( दिपेश)ले जानकारी दिनुभयो ।
दिनको समयमा कार्यालयको सेवालाई निरन्तरता दिने र फुर्सदमा जनताको घर घरमा गएर अवस्था र समस्या बुझ्ने यो अभियानको दमकमा चौतर्फी प्रशंसा हुन थालेको छ । अभियानबाट निस्केको निष्कर्षलाई सहि कार्यान्वायनमा लैजान सक्ने हो भने यसले थप प्रभाकारिता बढाउने छ ।
