दमक, फागुन १८
विकास निर्माण तथा वित्तीय प्रगतिले चाँही लक्ष्य भेट्न गाह्रो छ । तर अलि खुला र फुर्मास खर्च गर्न मिल्नेगरिको घुमफिरसँग जोडिने भ्रमण खर्चले भनें नेटो काटिसकेको छ ।
अर्थात चालु आर्थिक वर्षको माघ मसान्तसम्मको ७ महिनाको अवधिमा योजनासहितका काममा वित्तीय खर्च ३१.५ प्रतिशत मात्र प्रगति भएको अवस्थामा वर्षकोलागि १५ लाख छुट्याइएको भ्रमण खर्च भनेंं ९९.३६ प्रतिशत ( १४ लाख ९० हजार ४ सय ५० रुपैंयाँ ) सकिएको छ ।
यसखाले तथ्यांकले नगरका समग्र जनताकालागि विकास र अर्कातर्फ जनप्रनिनिधि र कर्मचारीको इच्छा अनुसारको आफ्नो भ्रमणसहितका गतिविधिमा तालमेल नमिलेको देखाउँछ । घुम्ने खर्च चाँही जतिपनि सकिइहाल्ने तर विकास निर्माणको काममा चाँही त्यो अनुसारको प्रगति नहुने कुराको दृष्टान्त प्रस्तुत गर्छ । यो दृष्टान्त हो दमक नगरपालिका कार्यालयको ।
१६ औं नगरसभाका अवसरमा आइतबार प्रस्तुत विवरणमा सो कुरा प्रष्टिएको हो । १ वर्षको भ्रमण खर्च रकम ७ महिनामै सकिएपछि बाँकी अवधिकालागि ७ लाख रुपैयाँ थप गरिएको देखिन्छ ।
