दमक, फागुन २८
सरकारी वा गैर सरकारी कार्यालयमा केही काम गर्नका लागि आफ्नो नेपाली नागरिकतासहितको कागजात चाहिने हुन्छ । तर नुन किन्न पनि नागरिकता चाहिन्छ भन्ने सुन्दा यो लोकतान्त्रिक मुलुकमा जनतालाई सास्ती दिएको भएन र भन्ने प्रश्न उठ्छ ।
यस्तै प्रश्न उठिरहेको छ यसबेला हुम्लामा । साल्ट ट्रेडिङ कर्पोरेसन लिमिटेडको ढुवानी अनुदानको नुन खरिद गर्न सर्वसाधारणले अनिवार्य नागरिकता पेश गर्नुपर्ने प्रावधान बनाइएपछि लिमिटेडको हुम्ला शाखाबाट हरेक हप्ता मंगलबार बिक्री हुने नुनका लागि उपभोक्ताले नागरिकताको प्रतिलिपि पेश गर्न निकै झमेला व्यहोरिरहेका छन् । नागरिकताको फोटोकपी गर्दा १० रुपैयाँ खर्च लाग्छ ।
लिमिटेडका हुम्ला शाखाका प्रमुख राजबहादुर लामाले नुन लिने व्यक्ति नदोहोरिऊन् भनेर नागरिकताको प्रतिलिपि लिने गरेको बताएपनि स्थानीयले नागरिकता बोकेर आउने कुरामा समस्या मानेका छन् । वडाले सिफारिस गर्दा पनि हुने तर वडाध्यक्ष आवश्यक परेको बेला नभएको अवस्थामा पनि नुन वितरण गर्न नागरिकताको फोटोकपी पेश गर्ने गरिएको शाखा प्रमुख लामाले जनाउनु भयो । यसरी नागरिकताको प्रतिलिपि पेश गरेपछि एकजनालाई १० केजी नुन बिक्री गर्ने गरिएको छ ।
हाल लिमिटेडको गोदाममा एक हजार ३९५ क्विन्टल नुन मौज्दात छ । यो आर्थिक वर्षको एक हजार १०० क्विन्टल नुनमा हालसम्म हवाईमार्गबाट ५८२ क्विन्टल ढुवानी भइसकेको र बाँकी पनि ढुवानीको चरणमा रहेका कारण समस्या नहुने लिमिटेडले जनाएको छ ।
