दमक, चैत्र १
चैत्र ५ गते देशभर स्वतन्त्र विद्यार्थी यूनियनको निर्वाचन हुदै छ । त्रिभुवन विश्वविद्यालय अन्तर्गतका सबै क्याम्पसमा चुनाव लागिरहेको छ ।
कहि तालाबन्दी भइरहेका छन् भने कहि कुनै न कुनै विवादले चुनाव अनिश्चित पार्ने पनि प्रयास भइरहेका छन ।
यही क्रममा दमकमा रहेको दमक बहुमुखी क्याम्पसमा पनि चुनावी माहोल तातेको छ । विभिन्न संगठन र स्वतन्त्र गरी प्यानल प्यानल खडा गरी विद्यार्थीहरु चुनावमा होमिएका छन् ।
यही क्रममा शुक्रबार अखिल नेपाल राष्ट्रिय स्वतन्त्र विद्यार्थी यूनियन (अनेरास्ववियू)का उम्मेदवारहरुले उज्यालो खबरको कार्यालयमा आएर आफ्ना एजेण्डाबारेमा जानकारी गराएका छन् ।
दमक क्याम्पसको शैक्षिक गुणस्तर बृद्धि गर्न विभिन्न विद्यार्थीमैत्री वातावरण निर्माण गर्नेदेखि लिएर केही फरक योजनासमेत अघि सारेका छन् ।
अध्यक्ष पदका उम्मेदवार निशम अधिकारीले दमक बाहिरबाट आइ दमकका डेरा गरी बसेर अध्ययन गर्ने विद्यार्थीहरुलाई नि:शुल्क एम्बुलेन्सको सुुविधा र सबै विद्यार्थीका लागि सहुलियत दरमा उपचारको व्यवस्था मिलाउने प्रतिवद्धता जनाउनुभयाे।
‘एम्बुलेन्स नि:शुल्क हुने छ , बिरामी भएकाहरुलाई उपचार गराउन दमकमा रहेका अस्पतालसँग समन्वय गरी सहुलपयत दरमा उपचार गराउने कुरामा अग्रगामी पहल गरिने छ ’ अधिकारीले सुनाउनुभयो ।
डेरामा बसिरहेका विद्यार्थीहरुलाई घरधनीसँग समन्वय गरी घरभाडा तथा अन्य सेवामा सहुलियतका लागि पहल गरिने सचिव पदका उम्मेद्धरा राकेश खड्काले उल्लेख गर्नुभयो । विद्यार्थीको व्यक्तित्व तथा क्षमता विकास गराउन तीन तीन महिनामा प्रशिक्षण कार्यक्रम आयाेजना गरी विद्यार्थीहरुलाई अध्यनशील बनाउन विषयगत अध्ययन तथा भ्रमणका कार्यक्रम समेत गराउन पहल गरिने खड्काले बताउनु भयो ।
यस्तै महिला विद्यार्थीहरुलाई चेन्जिङ रुम सहित सेनेटरी प्याडको व्यवस्था, कोषको सहि सदुपयोग गर्दै प्रत्यके तीन तीन महिनामा कोषको अवस्थाबारे सार्वजनिक र वर्षको अन्त्यमा वार्षिक अडिट अनिवार्य गर्ने अनेरास्ववियूको प्यानलबाट कोषाध्यक्षको उम्मेदवार रहनु भएकी प्रिती रानामगरले बताउनु भयो । यस्तै ‘छात्रावास निर्माण गर्ने कुरामा समेत हाम्रो पहल हुने छ । ’ उहाँले बताउनु भयो ।
दमक क्याम्पसमा ३ हजार सात सय ५ जना मताधिकार भएका विद्यार्थीहरु छन् ।
